„შეგვიძლია გასწავლოთ შერიფი როგორ დაამარცხოთ“ - საბურთალო რეალის წაგებას გამოეხმაურა

Crystalbet ეროვნული ლიგის კლუბი, „საბურთალო“ მადრიდის „რეალის“ სენსაციურ მარცხს გამოეხმაურა. გუშინ, „სამეფო კლუბმა“ საფეხბურთო სამყარო შოკში ჩააგდო და ტირასპოლის „შერიფთან“ 1-2 წააგო.

შეხვედრის შემდეგ, „რეალმა“ „ფეისბუქის“ საკუთარ გვერდზე მატჩის ერთ-ერთი მომენტის ამსახველი ფოტო გამოაქვეყნა და ქომაგებს ანგარიშისა და გოლის ავტორების შესახებ ამცნო. „საბურთალოს“ ოფიციალურმა გვერდმა კომენტარი სწორედ ამ პოსტზე დატოვა და ასე იხუმრა: „შეგვიძლია, გასწავლოთ შერიფი როგორ დაამარცხოთ“.

შეგახსენებთ, რომ 2019 წელს, ჩემპიონთა ლიგის საკვალიფიკაციო ეტაპის პირველ რაუნდში, „საბურთალომ“ სწორედ „შერიფის“ ბარიერი დაძლია. თბილისურმა კლუბმა პირველი შეხვედრა, რომელიც მოლდოვაში გაიმართა, 3-0 მოიგო, განმეორებითი მატჩი 1-3 წააგო და ორი შეხვედრის ჯამში, მომდევნო ეტაპის საგზური მოიპოვა.

სხვათა შორის, „საბურთალოს“ კომენტარს დიდი გამოხმაურება მოჰყვა და თბილისელთა ხუმრობა ბევრმა დააფასა, თუმცა იყვნენ ისეთებიც, რომლებმაც „საბურთალო“ გააკრიტიკეს.