სკანდალური ბრალდება გუნდის ლიდერს - არგენტინის ნაკრებმა პრესას ბოიკოტი გამოუცხადა!
ბოლო დღეებში სამხრეთ ამერიკული სპორტული პრესა ახალმა სკანდალმა მოიცვა.
საქმე ისაა, რომ არგენტინული Radio Mitre-ს რეპორტიორმა, გაბრიელ ანელმა, თავისი ქვეყნის ნაკრების ერთ-ერთ ლიდერს, ეზეკიელ ლავეცის, ნაკრების შეკრებისას, ბაზაზე, მარიხუანის მოხმარება დააბრალა, რაც ჯერჯერობით არ დასტურდება.
აღნიშნულთან დაკავშირებით, "ალბისელესტეს" ფეხბურთელებმა თანაგუნდელს მხარდაჭერა გამოუცხადეს და კაპიტნის, ლიონელ მესის თავოსნობით, შემდეგი განცხადება გააკეთეს:
"პიოხოს" (ლავეცი) წინააღმდეგ წაყენებული ბრალდება, თითქოს ის ბაზაზე მარიხუანას მოიხმარდა, აბსოლუტურად უსაფუძვლო და მეტიც, ამაზრზენია. არ ვაპირებთ, ჟურნალისტებს ასეთ ბინძურ თამაშში ავყვეთ. შესაბამისად, ამ ცილისწამების გამო, გადავწყვიტეთ, პრესასთან ურთიერთობა გავწყვიტოთ". - ესაა ფეხბურთელთა საერთო განცხადება.
"თქვენ შეგიძლიათ გაგვაკრიტიკოთ თამაშისა და შედეგების გამო, მაგრამ არ გაქვთ უფლება პირად შეურაცჰყოფასა და ცილისწამებაზე გადახვიდეთ". - ეს უკვე მესის კომენტარია.
ვერ გეტყვით სადამე მივა ეს ყველაფერი, თუმცა როგორც ვარაუდობენ, გაბრიელ ანელს ბოდიშის მოხდა მოუწევს.
მომზადებულია sports.ru-ს მიხედვით
