ვალენსიას ფინანსური კრიზისი - კლუბიდან ფეხბურთელები მიდიან
ესპანური ფეხბურთის ერთ-ერთ ისტორიულ კლუბს "ვალენსიას" უდიდესი ფინანსური პრობლემები აქვს. "ღამურების" ხელმძღვანელობამ ფინანსური პრობლემების დაძლევის მიზნით გუნდიდან მნიშვნელოვანი ფეხბურთელები გაუშვა და გაჩერებას არ აპირებს.
სეზონის მიწურულს "ვალენსია" ფერან ტორესმა, პარეხომ და ფრენსის კოკლენმა დატოვეს. ტორესი "მანჩესტერ სიტიში" გადავიდა. რაც შეეხებათ კოკლენს და პარეხოს, მათ "ვილიარეალს" მიაშურეს.
დღეს კი კლუბის მთავარი ბომბარდირი როდრიგო "ლიდსის" ფეხბურთელი გახდა. სპორტულ მედიაში ისიც დაიწერა, რომ კლუბს სხვა ფეხბურთელების გაშვებაც სურს. "ვალენსიას" ხელმძღვანელობა აქტიურად აწარმოებს მოლაპარაკებებს "ვილიარეალთან", "აიაქსთან" "ბარსელონასთან" და ინგლისის სხვადასხვა კლუბებთან.
???? OFICIAL | El @ValenciaCF anuncia un principio de acuerdo con el Leeds United (@LUFC) para el traspaso de Rodrigo Moreno
— El Partidazo de COPE (@partidazocope) August 25, 2020
???? Falta por superar el reconocimiento médico pic.twitter.com/ON5GjMxv6f
კლუბს გაბრიელის გაყიდვა "ყვითელ წყალქვეშა ნავში" სურს. რაც შეეხება გაიას, ხელმძღვანელები ესპანელს "ბარსელონას" სთავაზობენ. იგივე მდგომარეობაა სილესენზე. ნიდერლანდელის შემთხვევაში საუბარი ამსტერდამის "აიაქსთან" მიმდინარეობს. კონდოგბიას კი ინგლისში უპირებენ გაყიდვას. ჯერჯერობით უცნობია თუ რომელი კლუბი ინტერესდება ფრანგი ფეხბურთელით.
ჩამოთვლილი ფეხბურთელების გაყიდვა ამ ეტაპზე პრიორიტეტულია, მაგრამ პრესაში იმასაც აღნიშნავენ, რომ ლა ლიგის ექვსი გზის ჩემპიონს კიდევ სხვა ფეხბურთელების გაყიდვაც სურს. ესენი არიან კევინ გამეირო, გონსალო გედეში, დიახაბი, მანგალა, გარაი და სობრინო.
შეგახსენებთ, რომ "ვალენსიამ" სეზონი მე-9 ადგილზე დაასრულა და ვერცერთი ევროტურნირის საგზური ვერ მოიპოვა.