სპორტსმენი ძმები გატაცებისა და წამების ბრალდებით დააკავეს
Aa
Aa

სპორტსმენი ძმები გატაცებისა და წამების ბრალდებით დააკავეს

იური ლომაძე, რომელიც ბერძნულ-რომაულ სტილში საქართველოს ჩემპიონია, გატაცებისა და წამების ბრალდებით დააკავეს. იური ლომაძესთან ერთად მისი ძმა, ფეხბურთელი ლუკა ლომაძეც დაკავებულია. ძმებმა ლომაძეებმა და კიდევ სამმა თანამზრახველმა დაზარალებული ოზურგეთის ერთ-ერთ სოფელში, მიტოვებულ სახლში აწამეს. შემთხვევიდან რამდენიმე დღე გავიდა.

აღნიშნულ ფაქტთა დაკავშირებით განცხადება შინაგან საქმეთა სამინისტროს ოფიციალურ ვებგვერდზე განთავსდა, რომელსაც უცვლელად გთავაზობთ: ''შინაგან საქმეთა სამინისტროს აჭარისა და გურიის პოლიციის დეპარტამენტების თანამშრომლებმა, ერთობლივად ჩატარებული ოპერატიულ-სამძებრო და საგამოძიებო მოქმედებების შედეგად, ხუთი პირი: 1996 წელს დაბადებული ი.ლ., 2001 წელს დაბადებული ლ.ლ., 1996 წელს დაბადებული მ.დ., 1983 წელს დაბადებული მ.ბ და 1992 წელს დაბადებული ი.დ. მოსამართლის განჩინების საფუძველზე, ოზურგეთში დააკავეს. მათ ბრალი წინასწარი შეთანხმებით ჯგუფის მიერ თავისუფლების უკანონო აღკვეთასა და ჯგუფურად ჩადენილ ძალადობაში ედებათ. დანაშაული 2- დან 10 წლამდე ვადით თავისუფლების აღკვეთას ითვალისწინებს. გამოძიებით დადგინდა, რომ ბრალდებულებმა 1988 წელს დაბადებულ ნ.ძ.-ს ქალაქ ბათუმში, შურისძიების მოტივით, თავისუფლება უკანონოდ აღუკვეთეს, კერძოდ, ძალის გამოყენებით ჩასვეს მ.ბ.-ს მართვის ქვეშ მყოფ ავტომობილში, წაიყვანეს ოზურგეთის მუნიციპალიტეტის სოფელ ბოხვაურში, ერთ-ერთი მოქალაქის საცხოვრებელ სახლში, სადაც ფიზიკურად გაუსწორდნენ. წინასწარი შეთანხმებით ჯგუფის მიერ თავისუფლების უკანონო აღკვეთისა და ჯგუფური ძალადობის ფაქტზე გამოძიება საქართველოს სისხლის სამართლის კოდექსის 143-ე მუხლის მესამე ნაწილის „ა“ ქვეპუნქტით და 126-ე მუხლის პირველი პრიმა ნაწილის „ბ“ ქვეპუნქტით მიმდინარეობს.''

იური ლომაძე 72 კგ. წონით კატეგორიაში გამოდის. მიმდინარე წლის თებერვალში ევროპის ჩემპიონატზე ვერცხლის მედალი მოიპოვა. ფინალურ შეხვედრაში გერმანელ ფრანკ შტებლერთან 2:6 დამარცხდა.

მსგავსი სიახლეები

ცხელი ამბები