აღიარება პოლონეთში: გვილია ტურის საუკეთესო მოთამაშეა!
ვარშავული ''ლეგიას'' ქართველი ნახევარმცველი ვაკო გვილია პოლონეთის ექსტრაკლასას 24-ე ტურის საუკეთესო მოთამაშედ დასახელდა. საქართველოს ეროვნული ნაკრების ფეხბურთელმა უშუალო კონკურენტ ''კრაკოვიასთან'' შეხვედრაში ულამაზესი გოლი შეაგდო და ამ გოლით ''ლეგიამ'' უმნიშვნელოვანესი გამარჯვება მოიპოვა.
მიმდინარე სეზონში ვაკო გვილიამ პოლონეთის ჩემპიონატის 24 მატჩში 4 გოლი გაიტანა და 6 საგოლე გადაცემა შეასრულა.
საინტერესოა, რომ 25 წლის შემტევმა ''კრაკოვიას'' სეზონის პირველ ნახევარშიც გაუტანა გამარჯვების გოლი. ასე რომ უშუალო კონკურენტ ''კრაკოვიასთან'' მოგებულ მატჩებში გადამწყვეტი როლი შეასრულა. გარდა ამისა მეორე ტურში ''კორონას'' 90-ე წუთზე შეუგდო და ეს გოლიც გამარჯვების იყო.
24 ტურის შემდეგ ვარშავული კლუბი 48 ქულით პირველ ადგილზეა და მეორეადგილოსან ''კრაკოვიას'' 6 ქულით უსწრებს.
2016 და 2017 წლებში გვილია ბორისოვის ''ბატესთან'' ერთად ბელარუსიის ჩემპიონი გახდა. მიმდინარე სეზონში ქართველ ფეხბურთელს შესანიშნავი შანსი აქვს ''ლეგიასთან'' ერთად იზეიმოს ქვეყნის ჩემპიონობა. გარდა ამისა ''ლეგია'' პოლონეთის თასის მეოთხედფინალშია, სადაც მისი მეტოქე რანგით მეორე ლიგის ''მეძ ლეგნიცაა.''
