პარკ დე პრენსზე ოთხმა ქართველმა ითამაშა | პსჟ-მ მეცს მარტივად მოუგო

საფრანგეთის ლიგა 1-ის 23-ე ტურში პსჟ-მ შინ მეცი 3:0 დაამარცხა. მე-3 წუთზე დუემ ანგარიში გახსნა, პირველი ტაიმის მესამე დამატებულ წუთზე ბრედი ბარკოლამ შეაგდო. მეორე ტაიმში, 77-ე წუთზე გონსალუ რამუშმა სხვაობა სამ ბურთამდე გაზარდა.

 

ლუის ენრიკემ ხვიჩა კვარაცხელია სათადარიგოთა სკამზე დასვა, 64-ე წუთზე თამაშში ჩართო. ხვიჩამ გონსალუ რამუშის მისამართით ორი გადაცემა შეასრულა, თუმცა პორტუგალიელმა გოლის გატანის ეს შესაძლებლობები ვერ გამოიყენა.

 

მეცის სასტარტოში მხოლოდ ერთი ქართველი, გიორგი წიტაიშვილი იყო, 88-ე წუთზე შეცვალეს.

66-ე წუთზე მოედანზე გიორგი აბუაშვილი გამოვიდა, 79-ე წუთზე - გიორგი ქვილითაია. ასე რომ, ლიგა 1-ის ერთ მატჩში ოთხმა ქართველმა ითამაშა.

პსჟ 54 ქულით პირველზეა, მეცი 13 ქულით ბოლო პოზიციაზეა.

მომდევნო ტურში, 28 თებერვალს პსჟ ლე ავრს ესტუმრება, პირველ მარტს მეცი ბრესტს მიიღებს.