მარადონამ "ხიმნასია ლა პლატა" დატოვა
ლეგენდარულმა დიეგო მარადონამ „ხიმნასია ლა პლატას“ მთავარი მწვრთნელის პოსტი დატოვა. 59 წლის არგენტინელმა გუნდი სექტემბერში ჩაიბარა და კონტრაქტის მიხედვით სეზონის ბოლომდე უნდა ემუშავა, მაგრამ „დიეგიტოს“ კოლექტივმა 8 მატჩიდან 5 წააგო და სატურნირო ცხრილის 22-ე ადგილზე აღმოჩნდა.
წარუმატებელი ასპარეზობის გამო მარადონაზე და კლუბის პრეზიდენტზე, გაბრიელ პელეგრინოზე წნეხი ძალიან დიდი გახლდათ. დიეგომ განაცხადა, რომ პრობლემების მიუხედავად მზად იყო „ხიმნასია ლა პლატაში“ დარჩენილიყო, ოღონდ იმ შემთხვევაში თუ გაბრიელ პელეგრინო პრეზიდენტის პოსტს შეინარჩუნებდა. ეს უკანასკნელი კი გარკვეული მიზეზების გამო საარჩევნო რბოლას გამოეთიშა.
მარადონას წასვლის შესახებ არგენტინულ პრესას სწორედ პელეგრინომ აუწყა და ერთ-ერთ რადიოში სტუმრობისას განაცხადა, რომ 59 წლის არგენტინელმა სპეციალისტმა „ხიმნასია ლა პლატას“ მთავარი მწვრთნელის პოსტზე მუშაობა შეწყვიტა.
გავრცელებული ინფორმაცია მოგვიანებით „დიეგიტომაც“ დაადასტურა და „ინსტაგრამის“ საკუთარ გვერდზე პოსტი გამოაქვეყნა, რომელშიც აღნიშნა, რომ ხსენებულმა გადაწყვეტილებამ მას სული ატკინა. ლეგენდარულმა არგენტინელმა „ხიმნასია ლა პლატას“ წარმატება უსურვა და კლუბის ხელმძღვანელებს, სამწვრთნელო შტაბს, ფეხბურთელებს და გულშემატკივრებს მადლობა გადაუხადა.
.jpg)
