თბილისი 3X3 კალათბურთში ევროპის ჩემპიონატს მასპინძლობს

6, 7 და 8 სექტემბერს საქართველოს დედაქალაქი თბილისი პირველად მასპინძლობს 3X3 კალათბურთში 2019 წლის ევროპის თასს 18-წლამდელთა შორის. ღონისძიება გაიმართება რიყის პარკის ტერიტორიაზე და მასში მონაწილეობას მიიღებს ევროპის 16 ქვეყნის 24 ნაკრები (12 გოგონათა და 12 ვაჟთა) გუნდი. ჩვენი ქვეყანა ევროპის თასზე წარმოდგენილი იქნება როგორც ვაჟთა, ისე გოგონათა ნაკრებით.

ევროპის თასის ფარგლებში, ჩემპიონატის მსვლელობის სამივე დღეს, 6, 7 და 8 სექტემბერს, რიყის პარკის ტერიტორიაზე გულშემატკივრებისთვის და ბავშვებისთვის მოეწყობა გასართობი ზონები და გაიყიდება სხვადასხვა სახის პროდუქცია – ქართული ხელნაკეთი სუვენირები, საკალათბურთო აქსესუარები, სათამაშოები და საქართველოში წარმოებული პროდუქტები.

3×3 კალათბურთი გახლავთ სპორტის ოლიმპიური სახეობა, რომელსაც მსოფლიოში მნიშვნელოვანი ადგილი და როლი უკავია სპორტის ამ სახეობის პოპულარიზაციის და განვითარების საქმეში. საქართველოში სპორტის განვითარებისთვისა და ჩვენი ქვეყნის ევროპულ ოჯახში მეტი ჩართულობის კუთხით მნიშნელოვანია მსგავსი რანგის ტურნირის მასპინძლობა.

ევროპის თასზე დასასწრებად თბილისში ჩამოდის FIBA-EUROPE-ის აღმასრულებელი დირექტორი კამილ ნოვაკი, რომელიც მომავალი, 2021 წლის ევრობასკეტის მასპინძლობასთან დაკავშირებით საქართველოს კალათბურთის ეროვნული ფედერაციის ხელმძღვანელობასთან საორგანიზაციო საკითხებსაც განიხილავს.

პაატა გურასპაული