ბითაძემ შესაძლოა ლას-ვეგასის საზაფხულო ლიგის სტარტი გამოტოვოს
5 ივლისს ლას-ვეგასში სტარტს NBA-ს საზაფხულო ლიგა აიღებს, რომელშიც გოგა ბითაძის „ინდიანაც“ მონაწილეობს. „პეისერსი“ პირველ შეხვედრას „მემფის გრიზლისის“ წინააღმდეგ გამართავს და შესაძლოა ქართველი ცენტრის გარეშე იასპარეზოს.
Wishtv.com-ის სპორტული ჟურნალისტის, ჩარლი კლიფორდის ცნობით ბითაძეს ვიზასთან დაკავშირებული პრობლემები აქვს და ჯერჯერობით გაურკვეველია მოახერხებს თუ არა თამაშს.
No Goga Bitadze at #Pacers Rookie Camp due to a Visa situation. Status is up in the air for Summer League beginning this weekend in Vegas. @WISH_TV pic.twitter.com/k1b8r6OzUv
— Charlie Clifford (@cliffWISH8) July 1, 2019
ლას-ვეგასის საზაფხულო ლიგის წლევანდელ გათამაშებაში მონაწილეობას 32 გუნდი მიიღებს და ტურნირის მიმდინარეობისას ბევრ პერსპექტიულ ახალგაზრდას ვიხილავთ. მათ შორის „ნიუ ორლეან პელიკანსის“ ვარსკლავი, ზაიონ უილიამსონიც იქნება.
გოგა ბითაძის „ინდიანა“ საკვალიფიკაციო ეტაპზე 4 გუნდს დაუპირისპირდება. გახსნით მატჩში „პეისერსი“ „მემფისს“ გაეჯიბრება, შემდეგ კი საუკეთესოს ვინაობას „დეტროიტის“, „ატლანტას“ და „ტორონტოს“ წინააღმდეგ გაარკვევს. სასურველი შედეგის დაფიქსირების შემთხვევაში „პეისერსი“ პლეიოფის საგზურს მოიპოვებს და ჩემპიონობის მოსაპოვებლად იბრძოლებს.
