მჭედლიძე: ''ალბათ გუნდს კალიარიში არ გავყვები''
საქართველოს ეროვნული ნაკრების ფეხბურთელი ლევან მჭედლიძე სერია ა-ს შემდეგ ტურში ''კალიარის'' წინააღმდეგ დიდი ალბათობით ვერ ითამაშებს. ''ემპოლის'' ფორვარდმა CrystalSport-თან მცირე კომენტარი გააკეთა: ''5 დღეა სხეულის მაღალი ტემპერატურა მაქვს. სავარაუდო, კალიარიაში გუნდს არ გავყვები. ანალოგიურ მდგომარეობაში ''ემპოლის'' კიდევ 2 ფეხბურთელია.''
''კალიარისთან'' მატჩს ''მილანის'' ყოფილი ფეხბურთელი ლუკა ანტონელი და კაპეზი გამოტოვებენ. როგორც ლევანმა აღნიშნა, მათ სიცხე აქვთ. 20 იანვარს ''კალიარი'' ''ემპოლის'' უმასპინძლებს.
მიმდინარე სეზონში ლევან მჭედლიძემ ''ემპოლის'' მაისურით 6 მატჩი ჩაატარა ( 5 შეხვედრა - იტალიის სერია ა, 1 მატჩი - იტალიის თასი).
მიმდინარე სეზონში მჭედლიძემ თავი ყველაზე კარგად ''მილანთან'' შეხვედრაში წარმოაჩინა. სერია ა-ს მე-6 ტურში ''ემპოლიმ'' ''კარლო კასტელანიზე'' ჯენარო გატუზოს გაწვრთნილ ''მილანს'' უმასპინძლა. საფეხბურთო დაპირისპირება ფრედ 1:1 დასრულდა.
მეორე ტაიმში თამაშში 28 წლის ლევან მჭედლიძე ჩართო, რომელიც ქულის მოპოვებაში მასპინძლებს მნიშვნელოვნად დაეხმარა. ქართველმა თავდამსხმელმა პენალტი გამოიმუშავა, რომელიც ფრანჩესკო კაპუტომ ზუსტად შეასრულა და ანგარიში გათანაბრდა - 1:1.
შეგახსენებთ, მიმდინარე თვეში მჭედლიძემ CrystalSport-თან საუბარში აღნიშნა, რომ შესაძლოა კლუბი დატოვოს, თუმცა ამ ეტაპზე ფეხბურთელი გუნდში რჩება.
მჭედლიძემ ''ლეჩეში'' ტრანსფერი გამორიცხა. მისი თქმით აღნიშნული კლუბიდან დაინტერესება არ ყოფილა.
ლევან მჭედლიძე: ''გამორიცხული არაფერია, შესაძლოა ''ემპოლი'' დავტოვო. სერია ა-ს რამდენიმე გუნდის მხრიდან დაინტერესება რეალურია, თუმცა ამ ეტაზე დაინტერესებულ კლუბებზე საუბარი არ შემიძლია. რაც შეეხება ''ლეჩეში'' შესაძლო ტრანსფერს, აღნიშნული კლუბის მხრიდან წინადადება ნამდვილად არ მიმიღია, ეს ინფორმაცია სიმართლეს არ შეესაბამება.''