მბაპე რეალს დაუბრუნდა - ოლისე კოპას გაუთანაბრდა

ზინედინ ზიდანის ხელმძღვანელობით საფრანგეთის ფეხბურთელთა ნაკრებმა სადებიუტო მატჩი მოიგო. „სამფეროვნებმა“ სტუმრად თურქეთის ეროვნული გუნდი მინიმალური სხვაობით დაამარცხეს, თუმცა მოხდა ერთი უსიამოვნო ფაქტი, რამაც ფრანგები გამარჯვების მიუხედავად, ცუდ ხასიათზე დააყენა. კერძოდ, დაშავდა ერთადერთი გოლის ავტორი კილიან მბაპე და ამ სანაკრებო ფანჯრის დროს ეროვნულ გუნდს ვეღარ დაეხმარება.

როგორც თამაშის შემდეგ გამართულ პრესკონფერენციაზე ზიდანმა აღნიშნა, მედიკოსების მხრიდან პირველადი დათვალიერებით, კილიანის მუხლი არცთუ კარგ მდგომარეობაში გამოიყურება, რის გამოც რისკის თავიდან არიდების მიზნით მიღებულ იქნა გადაწყვეტილება, რომ მბაპე „რეალს“ დაუბრუნდება. აქვე გეტყვით, რომ კილიანს ასისტენტობა თურქებთან მატჩში მაიკლ ოლისემ გაუწია, რომლისთვის ეს 2026 წელს ნაკრებში შესრულებული მეცხრე საგოლე გადაცემა იყო და ამ მხრივ ფრანგ ფეხბურთელებს შორის რაიმონ კოპას მიერ 1958 წელს დამყარებული რეკორდი მოხსნა.

ცნობისათვის, საფრანგეთის ნაკრები 28 სექტემბერს სტუმრად ბელგიას დაუპირისპირდება, 2 და 5 ოქტომბერს კი იტალიისა და იმავე ბელგიის ნაკრებს უმასპინძლებს. რაც შეეხება „რეალს“, სანაკრებო პაუზის შემდეგ მადრიდელები 10 ოქტომბერს ესპანეთის ჩემპიონატში გიორგი მიქაუტაძის „ვილიარეალს“ უმასპინძლებენ, 14 ოქტომბერს კი, ჩემპიონთა ლიგის ჯგუფური ფაზის მეორე ტურში სტუმრად „რომასთან“ ითამაშებენ.