დააკავეს ადამიანი, რომელიც მბაპესა და სხვა მდიდარი ადამიანების გატაცებას გეგმავდა

საფრანგეთში რამდენიმე მდიდარი ადამიანის, მათ შორის „რეალის“ ფორვარდის, კილიან მბაპეს გაძარცვის ან მოტაცების გეგმების გამო 18 წლის კლემან ლ. დააკავეს.

Le Parisien-ის ცნობით, კლემან ლ. იყო ბანდის ლიდერი, რომელიც 26 პირის მიმართ კანონსაწინააღმდეგო ქმედებების ჩადენას აპირებდა. მბაპეს გარდა, პოტენციური მსხვერპლები შეიძლებოდა ყოფილიყვნენ დაუსახელებელი რეპერი, ხორცის მოვაჭრე და ბიზნესმენები. კლემანი თანამზრახველებს სოციალურ ქსელებში ბრძანებებს ფსევდონიმით „ლესტერ Z“ აძლევდა.

21 აგვისტოს კლემანს, ერთ-ერთ თანამზრახველთან ერთად, ოფიციალურად წაუყენეს ბრალი აპრილში საათების ოსტატის გაძარცვისთვის. გაირკვა, რომ 11 აპრილიდან 19 აგვისტომდე პერიოდში ის კიდევ რამდენიმე ძარცვას ან მოტაცებას გეგმავდა. ეს ამოღებული ტელეფონების შესწავლის შემდეგ გახდა ცნობილი.

კლემანი ამჟამად დაკავებულია და იზოლირებულ საკანშია მოთავსებული, მაშინ როცა მისი სავარაუდო თანამზრახველი გაათავისუფლეს, თუმცა სასამართლო ზედამხედველობის ქვეშ იმყოფება.