MLS-ში ტრანსფერი ჩაიშალა | მექვაბიშვილი კრაიოვაში რჩება?

საქართველოს ნაკრების ნახევარმცველი, ანზორ მექვაბიშვილი მიმდინარე ზაფხულის სატრანსფერო ფანჯარაზე MLS-ის გუნდ „ჩიკაგო ფაიერში“ აღარ გადავა. ამის შესახებ ინფორმაციას რუმინული მედია ავრცელებს.

სააგენტო gsp.ro წერს, რომ მექვაბიშვილი „ჩიკაგო ფაიერში“ გადასვლასთან ძალიან ახლოს იყო და მხარეებს შორის საბოლოო შეთანხმებაც არსებობდა, თუმცა ტრანსფერი ბოლო წუთს ჩაიშალა.

რა წერია GSP-ის ინფორმაციაში:

ქართველი ნახევარმცველი ანზორ მექვაბიშვილი MLS-ის კლუბ „ჩიკაგო ფაირში“ გადასვლასთან ძალიან ახლოს იყო, თუმცა ეს გახმაურებული ტრანსფერი ბოლო წუთს ჩაიშალა. 25 წლის ფეხბურთელი, რომელიც 2023 წელს „დინამო თბილისიდან“ 750,000 ევროდ გადმოსვლის შემდეგ „უნივერსიტატეა კრაიოვას“ ნახევარდაცვის საკვანძო ფიგურაა, უახლოეს მომავალში რუმინეთის ლიგა 1-ში დარჩება. ეს ჩაშლილი ტრანსფერი სულ რაღაც რამდენიმე კვირაში მოჰყვა „ჩიკაგო ფაირის“ მიერ 38 წლის პოლონელი თავდამსხმელის, რობერტ ლევანდოვსკის მოულოდნელ დამატებას, რაც ხაზს უსვამს ამერიკული კლუბის ამბიციას, ერთმანეთს შეუთავსოს გამოცდილება და ახალგაზრდა ტალანტები.

საზაფხულო სატრანსფერო ფანჯრის დროს „კრაიოვასა“ და ჩიკაგოურ კლუბს შორის მოლაპარაკებები ჩიხში შევიდა. როგორც ირკვევა, პირადი კონტრაქტის დეტალები და სამუშაო ვიზასთან დაკავშირებული საკითხები იმაზე რთული აღმოჩნდა, ვიდრე თავდაპირველად ვარაუდობდნენ. მიუხედავად იმისა, რომ MLS-ის გუნდს, გავრცელებული ცნობებით, წინასწარი კონტრაქტი უკვე გაფორმებული ჰქონდა, ქართველი ფეხბურთელის აგენტმა „მოულოდნელი ლოგისტიკური დაბრკოლებები“ დაასახელა, რამაც ორივე მხარე აიძულა პროცესი შეეჩერებინათ. ამავდროულად, „კრაიოვა“ სამომავლოდ მის გაყიდვას არ გამორიცხავს; კლუბის სპორტულმა დირექტორმა მიანიშნა, რომ 1-ელ სექტემბრამდე, სატრანსფერო ფანჯრის დახურვამდე, შესაძლოა სხვა ევროპული კლუბების ინტერესიც გამოიკვეთოს. ამ ეტაპზე მექვაბიშვილი ვარჯიშს „ოლტენებთან“ აგრძელებს და რუმინული კლუბის განაცხადში რჩება.

მექვაბიშვილის გუნდში ყოფნა მხოლოდ ტაქტიკური უპირატესობა არ არის; ის მნიშვნელოვნად ამაღლებს გუნდის მორალს ევროპა ლიგის საგზურის მოპოვებისთვის ბრძოლაში. სომხურ „არარატთან“ პლეი-ოფის საპასუხო მატჩს გუნდი საერთო ანგარიშით 1-1 ხვდება, სადაც ქართველი ფეხბურთელის უნარი - ნახევარდაცვის სიღრმიდან უკარნახოს გუნდს ტემპი - გადამწყვეტია. ამ სეზონში ლიგის 12-ვე მატჩში ის სასტარტო შემადგენლობაში იყო, შეასრულა სამი საკვანძო გადაცემა, რომლებსაც გოლი მოჰყვა და დაცვაშიც საიმედოდ თამაშობს ჩაჭრების მაღალი მაჩვენებლით. მისი გამოცდილება ევროთასებზე - წარსულში ჯგუფურ ეტაპზე ორჯერ მოხვედრა - სტაბილურობას მატებს მის ახალგაზრდა თანაგუნდელებს. თუ „კრაიოვა“ კვალიფიკაციას გაივლის, მექვაბიშვილი იქნება იმ მცირერიცხოვან ფეხბურთელთა შორის, რომლებსაც მოგებული აქვთ შიდა ლიგა, თასი და სუპერთასი, რაც მის ლიდერულ როლს კიდევ უფრო ამყარებს.

რაც შეეხება მომავალს, მომდევნო რამდენიმე კვირა გადამწყვეტი იქნება როგორც ფეხბურთელისთვის, ისე კლუბისთვის. თუ „კრაიოვას“ ევროპული ამბიციები განხორციელდება, მექვაბიშვილი შესაძლოა უფრო დიდ სცენაზე აღმოჩნდეს, რამაც შეიძლება მის მიმართ საზღვარგარეთიდან ინტერესი ხელახლა გააღვივოს. მეორე მხრივ, წარმატებული შიდა სეზონის შემთხვევაში, ის შესაძლოა იმ პროექტის ცენტრალურ ფიგურად იქცეს, რომლის მიზანიც „უნივერსიტატეა კრაიოვას“ ევროტურნირების სტაბილურ მონაწილედ ჩამოყალიბებაა.

ეს ეპიზოდი შეგახსენებთ, რომ გლობალიზებული ფეხბურთის ეპოქაშიც კი, კონტრაქტებისა და ვიზების წვრილმანმა დეტალებმა შეიძლება ფეხბურთელის ბედი გადაწყვიტოს. კლუბის მიერ მექვაბიშვილის შენარჩუნება კი შესაძლოა გადამწყვეტი აღმოჩნდეს ევროტურნირებზე კვალიფიკაციის მოპოვების გზაზე.

2024 წლის იანვარში „კრაიოვამ“ მექვაბიშვილი „დინამო თბილისიდან“ 750 000 ევროდ შეიძინა. „კრაიოვა“ რუმინეთის ჩემპიონი, ქვეყნის თასისა და სუპერთასის გამარჯვებულია, რაშიც ქართველის წვლილი დიდია, გუნდის ერთ-ერთ ლიდერად ითვლება. მექვაბიშვილმა ყველა ტურნირის ჩათვლით „კრაიოვას“ მაისურით 118 მატჩი ჩაატარა, 7 გოლი გაიტანა და 14 საგოლე გადაცემა შეასრულა, ასევე 13 ყვითელი ბარათიც მიიღო. საქართველოს ეროვნულ ნაკრებში მის ანგარიშზე 33 მატჩი, 4 საგოლე პასი და 3 ყვითელი ბარათია.