სენსაცია აიბროქსზე | იბერია 1999-ის მეტოქე ევროპა ლიგის პლეიოფში ცნობილია

„იბერია 1999“ ევროპა ლიგის პლეიოფში „იაგიელონიას“ დაუპირისპირდება. პოლონურმა გუნდმა მესამე საკვალიფიკაციო ეტაპზე „რეინჯერსი“ დაამარცხა. „იაგიელონიამ“ პირველი თამაში 2:1 მოიგო, განმეორებითი შეხვედრა კი „აიბროქსზე“ ფრედ, 1:1 დასრულდა.

„რეინჯერსი“ სათამაშო უპირატესობას ფლობდა და მალევე დაწინაურდა. მე-19 წუთზე პოლონელთა კარის მიმართულებით თერთმეტმეტრიანი დაინიშნა, რომელიც ლოურენს შენკლენდმა გამოიყენა და „რეინჯერსს“ პირველი ტაიმი მოაგებინა.

მეორე ნახევარში თანაბარი თამაში მიდიოდა, სანამ ნიკ პრელეცმა არ გაიტანა. „იაგიელონიას“ ფორვარდმა 65-ე წუთზე შეაგდო. დარჩენილ დროში „რეინჯერსი“ ბევრს ეცადა, თუმცა არაფერი გამოუვიდა და კონფერენს ლიგაზე გადაინაცვლა.

ცნობისთვის, „იაგიელონიას“ და „იბერია 1999“-ის პირველი შეხვედრა პოლონეთში, 20 აგვისტოს გაიმართება. ქართული კლუბი განმეორებით მატჩს საკუთარ კედლებში 27 აგვისტოს გამართავს. „რეინჯერსი“ კონფერენს ლიგის პლეიოფში ვახტანგ ჭანტურიშვილის „იაბლონეცს“ შეხვდება.