დროის გაყვანის პრევენციისთვის - პრემიერ ლიგა ახალ წესის დანერგვას აპირებს

მიმდინარე სეზონში ინგლისურ ფეხბურთში ახალი წესის ტესტირება იგეგმება, რომლის მიზანიც მეკარეების მხრიდან ტაქტიკურად დროის გაყვანის მცდელობების აღმოფხვრაა. ინიციატივას მხარი დაუჭირეს პრემიერლიგამ, ინგლისის ფეხბურთის ასოციაციამ (FA), ინგლისის საფეხბურთო ლიგამ (EFL), ნაციონალურმა ლიგამ და ქალთა სუპერლიგამ (WSL). ახლა ჯერი ფეხბურთის ასოციაციის საერთაშორისო საბჭოზეა (IFAB).

ახალი შემაკავებელი მექანიზმი დროის გაყვანის წინააღმდეგ

ინგლისური ფეხბურთის მმართველმა ორგანოებმა თანამედროვე ფეხბურთის ერთ-ერთი ყველაზე გამაღიზიანებელი ხრიკის წინააღმდეგ გაერთიანება გადაწყვიტეს. BBC Sport-ის ინფორმაციით, ინგლისის წამყვანმა საფეხბურთო ორგანიზაციებმა ახალი, ნოვატორული წესის სატესტო რეჟიმში ამოქმედება ერთობლივად დაამტკიცეს.

სიახლე, რომელიც ინგლისელ მსაჯთა კორპუსის (PGMOL) ხელმძღვანელთან, ჰოვარდ უებთან მჭიდრო თანამშრომლობით შემუშავდა, იმ გუნდების მკაცრად დასჯას ისახავს მიზნად, რომლებიც მეკარის ყალბი ტრავმით მანიპულირებენ. აღნიშნული ტაქტიკა ხშირად გამოიყენება დროის გასაყვანად და ტემპის დასაგდებად.

როგორ იმუშავებს ახალი წესი?

• თუ მსაჯი სამედიცინო პერსონალს მეკარის დასახმარებლად მოედანზე უხმობს, მწვრთნელს 10 წამი ექნება იმისთვის, რომ დაასახელოს მინდვრის მოთამაშე, რომელიც მოედანს 1 წუთით დატოვებს.
• მწვრთნელმა თავისი გადაწყვეტილების შესახებ მეოთხე მსაჯს უნდა აცნობოს.
• თუ 10 წამის გასვლის შემდეგ მოთამაშე არ დასახელდება, მოედნის 1 წუთით დატოვება გუნდის კაპიტანს მოუწევს.

რატომ გახდა წესის შეცვლა აუცილებელი?

ამ საკითხმა განსაკუთრებული აქტუალობა გასულ სეზონში მომხდარი რამდენიმე რეზონანსული ეპიზოდის შემდეგ შეიძინა. მაგალითად, ნოემბერში „ლიდსის“ მთავარმა მწვრთნელმა, დანიელ ფარკემ, „მანჩესტერ სიტის“ მეკარე ჯანლუიჯი დონარუმა წესების ბოროტად გამოყენებასა და თამაშის ტემპის დასაგდებად ტრავმის სიმულაციაში დაადანაშაულა.

მსგავსი ქმედებები თანამედროვე ფეხბურთში ჩვეულებრივ მოვლენად იქცა — მეკარეები მიზანმიმართულად წვებიან მინდორზე, რათა მეტოქის იერიში შეაჩერონ, რაც გულშემატკივრების უკმაყოფილებას იწვევს. მწვრთნელები და ექსპერტები კი დაუყოვნებლივ რეაგირებას ითხოვდნენ

გამონაკლისი შემთხვევები

მართალია, ახალი რეგულაციის მთავარი მიზანი ტაქტიკური მანიპულაციების აღმოფხვრაა, თუმცა წესებში კონკრეტული გამონაკლისებიც არის გათვალისწინებული. თანაგუნდელს მოედნის დატოვება არ მოუწევს შემდეგ შემთხვევებში:

• თუ მეკარე აცხადებს, რომ სამედიცინო დახმარება არ სჭირდება და მისი ქმედებით თამაში არ შეჩერებულა.
• თუ მეკარე და მინდვრის მოთამაშე ერთმანეთს ფიზიკურად შეეჯახნენ.

სატესტო რეჟიმის მიზანია, რომ მსაჯების ქმედება პროაქტიული იყოს და არა უბრალოდ რეაქცია იმ ტაქტიკურ მითითებებზე, რომლებსაც ფეხბურთელები პაუზის დროს იღებენ. ოფიციალური პირები მოთამაშეებს არ აუკრძალავენ გვერდით ხაზთან მისვლას, როცა მეკარეს სამედიცინო დახმარებას უწევენ, თუმცა მოლოდინია, რომ 1 წუთით 10 კაცის ამარა დარჩენის პერსპექტივა ამგვარი სიმულაციებისთვის ეფექტური შემაკავებელი ფაქტორი გახდება.