“ასეთ თამაშებში შეიძლება ყველაფერი მოხდეს“ - მარტინესი ფინალის წინ

მსოფლიო ჩემპიონატის ფინალში ესპანეთი არგენტინას დაუპირისპირდება. მატჩის წინ, ალბისელესტეს კარის დარაჯმა ემილიანო მარტინესმა ჟურნალისტებთან ისაუბრა.

მარტინესი:

„მსოფლიო ჩემპიონატის ფინალში თამაში წარმოუდგენელი გრძნობაა. როცა ბავშვი ვიყავი, ასეთ მომენტზე ვოცნებობდი. ახლა კი კიდევ ერთხელ გვაქვს შანსი, არგენტინას სიხარული მოვუტანოთ. ფინალები სხვანაირი მატჩებია. აქ მნიშვნელობა აღარ აქვს, ვინ არის ფავორიტი. ასეთ თამაშებში ყველაფერი შეიძლება მოხდეს.

ესპანეთი ძალიან ტექნიკური გუნდია. მათ უყვართ ბურთის ფლობა, მოთმინებით აშენებენ შეტევებს და თითოეულ შეცდომას იყენებენ და გსჯიან. მაქსიმალურად კონცენტრირებულები უნდა ვიყოთ. ვიცით, რამდენად რთული მატჩი გველოდება.

ყველა სტადიონზე ისე ვგრძნობთ თავს, თითქოს სახლში ვთამაშობდეთ. ჩვენი გულშემატკივრები ყველგან არიან და მათგან მიღებული ენერგია უდიდესი უპირატესობაა. როცა ხედავ, როგორ ზეიმობენ ადამიანები არგენტინაში, როგორ უყურებენ ჩვენს თამაშებს შუაღამისას, ხვდები, რომ მათთვის თამაშობ. ეს დამატებით ძალას გვაძლევს.

ამ ნაკრების ყველაზე დიდი ძალა ერთმანეთის ნდობაა. ყველამ იცის თავისი როლი და ყველა მზად არის გუნდისთვის თავი გაწიროს. როგორც მეკარემ, ვიცი, რომ ფინალში ერთი სეივიც კი შეიძლება გადამწყვეტი აღმოჩნდეს. სწორედ ამიტომ ვემზადები ყოველთვის ისე, თითქოს კარიერის ყველაზე მნიშვნელოვანი მატჩი მელოდება.

„პენალტების სერია? არა. იმაზე ვფიქრობ, რომ მატჩი 90 წუთში მოვიგოთ. თუ პენალტებამდე მივა საქმე, მაშინ უკვე ჩემს საქმეს გავაკეთებ, მაგრამ ახლა მხოლოდ თამაშზე ვართ კონცენტრირებულები.“

შეგახსენებთ, რომ ესპანეთმა პლეი-ოფში ავსტრია, პორტუგალია, ბელგია და საფრანგეთი დაამარცხა. არგენტინამ კი კაბო-ვერდე, ეგვიპტე, შვეიცარია და ინგლისი. ფინალური დაპირისპირება 19 ივლისით თარიღდება და თბილისის დროით 23:00-დან დაიწყება.