რომერო: როგორც ჩანს, ტანჯვის გარეშე მოგება უბრალოდ არ შეგვიძლია

არგენტინის ნაკრების მცველმა კრისტიან რომერომ მსოფლიო ჩემპიონატის 1/4-ფინალში დამატებით დროში შვეიცარიის წინააღმდეგ მოპოვებულ გამარჯვებაზე (3:1) ისაუბრა.

„როგორც ჩანს, ტანჯვის გარეშე მოგება უბრალოდ არ შეგვიძლია. მაგრამ ბედნიერი ვარ და ამ გუნდით ვამაყობ. რასაც ახლა ვაკეთებთ, დაუჯერებელია. და გაჩერებას ნამდვილად არ ვაპირებთ“,

– თქვა რომერომ.

ნახევარფინალში ინგლისის წინააღმდეგ მომავალ მატჩზე საუბრისას, „ტოტენჰემის“ მცველმა ყველას მოუწოდა, რომ შეხვედრას გადაჭარბებული მნიშვნელობა არ მიანიჭონ.

„ეს უბრალოდ კიდევ ერთი მატჩია. არ არის საჭირო მისგან რაიმე განსაკუთრებულის შექმნა. ეს ფეხბურთია. ჩვენ მხოლოდ საკუთარ თავზე ვართ ფოკუსირებულები და გვინდა ვაჩვენოთ ჩვენი გუნდის დნმ, რომელსაც ბოლო წლების განმავლობაში ვავლენთ. ზოგჯერ ტანჯვა გიწევს, ზოგჯერ კარგად თამაშობ, ზოგჯერ – არა საუკეთესოდ. მაგრამ ყველაზე მთავარია მოედანზე გულით გახვიდე, ინიციატივა საკუთარ ხელში აიღო და ბოლომდე იბრძოლო“,

– დასძინა რომერომ.

შეგახსენებთ, რომ ინგლისი არგენტინის ნახევარფინალი 15 ივლისს, ჩვენი დროით 23:00-ზე გაიმართება.