ევრობასკეტის B დივიზიონი | საქართველოს 20-წლამდე ნაკრები უკრაინასთან დამარცხდა

საქართველოს 20-წლამდე კალათბურთელთა ნაკრებმა ევრობასკეტის B დივიზიონში ჯგუფური ეტაპის პირველი შეხვედრა გამართა. კოტე ტუღუშის გუნდი უკრაინას დაუპირისპირდა და 64:77 დამარცხდა.

მატჩის პირველი მეოთხედი უკრაინელთა უპირატესობით წარიმართა და მათ 21:14 იმარჯვეს, მეორე პერიოდში კი ჩვენზე ერთით მეტი ქულა ჩააგდეს და შესვენებაზე 43:35-ს იგებდნენ. მესამე მეოთხედში უკრაინელები 16 ქულით გავიდნენ წინ, თუმცა ჩამორჩენა 4 ქულამდე დავიყვანეთ. სამწუხაროდ, ეს ჩვენი მაქსიმუმი აღმოჩნდა და დარჩენილ დროში უკრაინამ კომფორტული უპირატესობა მოიპოვა.

საქართველოს 20-წლამდე ნაკრების მხრიდან ყველაზე მეტი, 16 ქულა ლუკა კოტლიარევსკიმ ჩააგდო. გიორგი ჭირაკაძემ 11 ქულა და 8 მოხსნა მიითვალა. გიორგი დოხნაძესა და ამირან აროშიძეს 10-10 ქულა ჰქონდათ.

ცნობისთვის, უკრაინის გარდა, B ჯგუფში ლუქსემბურგი, შვეიცარია და ესტონეთი არიან. ტუღუშის გუნდის მომდევნო მეტოქე შვეიცარიაა, რომელსაც 11 ივლისს დაუპირისპირდება.