მადრიდიდან ლონდონში - ფულემში არბელოა მიიწვიეს
ბრიტანული მედიის ინფორმაციით, ფულემი ალვარო არბელოას დანიშვნასთან ძალიან ახლოს არის.
BBC-ის ცნობით, ლონდონური კლუბი აქტიურ მოლაპარაკებებს აწარმოებს 43 წლის ესპანელ სპეციალისტთან, რომელიც, არსებული ინფორმაციით, დასავლეთ ლონდონში მთავარი მწვრთნელის პოსტის მთავარი კანდიდატია.
„ფულემის“ ყოფილი დამრიგებელი მარკო სილვა ხუთწლიანი მუშაობის შემდეგ გუნდიდან წავიდა და კარიერას ბენფიკაში გააგრძელებს.
არბელოამ გასულ სეზონში მადრიდის რეალი დროებით ჩაიბარა, მას შემდეგ რაც გუნდი სეზონის მსვლელობისას ჩაბი ალონსომ დატოვა და მოგვიანებით ლონდონის ჩელსი ჩაიბარა.
მიუხედავად იმისა, რომ მხარეებს შორის საბოლოო შეთანხმება ჯერ არ გაფორმებულა, „ფულემში“ იმედოვნებენ, რომ უახლოეს პერიოდში არბელოა გუნდის ახალი მთავარი მწვრთნელი გახდება.
შეგახსენეთ, რომ ესპანელმა მთელი სამწვრთნელო კარიერა მადრიდის რეალის სისტემაში გაატარა, სადაც ახალგაზრდული გუნდებიდან დაიწყო და საბოლოოდ პირველი გუნდის დროებითი მწვრთნელი გახდა.
