მეკარის სუპერმატჩი და სენსაციური გამარჯვება - ავსტრალიამ თურქეთს მოუგო

ავსტრალიამ მსოფლიო ჩემპიონატი გამარჯვებით დაიწყო და თურქეთი 2:0 დაამარცხა.

მატჩის პირველი ტაიმი თურქების აშკარა უპირატესობით წარიმართა. ვინჩენცო მონტელას გუნდი ბურთს აკონტროლებდა და მეტოქის კარისკენ 10-ჯერაც დაარტყა, თუმცა 27-ე წუთზე ავსტრალიელები კონტრშეტევაზე გაიქცნენ და ნესტორი ირანკუნდამ უგურჩან ჩაქირის კარი აიღო.

მეორე ტაიმში მოედანზე კენან ილდიზი გამოჩნდა, თურქეთმა კი კიდევ უფრო გაზარდა წნეხი მეტოქეზე, თუმცა მეორე გოლის გატანა 53-ე წუთზე ისევ ავსტრალიას შეეძლო: კუთხურის შემდეგ ჰარი სუტარის თავური დარტყმა ჩაქირმა მოიგერია. მალევე არდა გიულერი ახლოს იყო ანგარიშის გათანაბრებასთან, როცა მისი შესრულებული ჯარიმა ავსტრალიელთა მეკარემ, პატრიკ ბიჩმა მოიგერია.

72-ე წუთზე ჩელიქის დარტყმის შემდეგ კვლავ ბიჩმა იყოჩაღა, 75-ე წუთზე კი კონორ მეტკალფმა ავსტრალიელთა უპირატესობა ორამდე გაზარდა.

დარჩენილ დროში ავსტრალიის ნაკრები დაცვაში დამაჯერებლად მოქმედებდა და სასურველი ანგარიშის შენარჩუნება შეძლო.

პირველი ტურის შემდეგ ავსტრალია და აშშ 3-3 ქულით პირველ და მეორე ადგილებს იყოფენ, თურქეთსა და პარაგვაის კი ჯერჯერობით 0 ქულა აქვთ. მომდევნო ტურში აშშ ავსტრალიას (19 ივნისი), თურქეთი კი პარაგვაის (20 ივნისი) დაუპირისპირდება.