შენგელია შერმადინის წინააღმდეგ - ქართული დაპირისპირება ესპანეთში

ესპანეთის ლიგა ენდესას რეგულარული გათამაშების 32-ე ტურში ქართველი კალათბურთელების დაპირისპირება შედგა. „ლაგუნა ტენერიფემ“ საკუთარ დარბაზში „ბარსელონას“ უმასპინძლა და 5-ქულიანი სხვაობით, 97:102 დამარცხდა. მასპინძლების რიგებში უჩვეულოდ დაბალი შედეგიანობით გამოირჩა გიორგი შერმადინი, სტუმართა შორის კი თორნიკე შენგელიამ გაცილებით კარგი მატჩი ჩაატარა.

შერმადინი თამაშში სათადარიგო სკამიდან ჩაერთო და 16 წუთში 2 ქულა და 2 მოხსნა დააგროვა. მან ოთხიდან ერთი ორქულიანი ჩააგდო, პერიმეტრიდან და საჯარიმოს ხაზიდან კი არ უსვრია. რაც შეეხება შენგელიას, საქართველოს ნაკრების კაპიტნის ანგარიშზე 21 წუთში 13 ქულა, 2 მოხსნა, 2 შედეგიანი გადაცემა და 1 ჩაჭრაა. თოკომ ორიდან ერთი სამქულიანი და ექვსიდან ხუთი ორქულიანი ჩააგდო, საჯარიმოს ხაზიდან კი არ უსვრია.

ცნობისათვის, 32 ტურის შემდეგ 23 მოგებითა და 9 წაგებით „ბარსელონა“ სატურნირო ცხრილში მესამე ადგილზეა, ხოლო „ლაგუნა ტენერიფე“ 17 გამარჯვებითა და 14 მარცხით მეშვიდე პოზიციას იკავებს.