„სულ მცირე 2 კვირა გაუცდება“ - The Athletic-ი მამარდაშვილის ტრავმაზე

გიორგი მამარდაშვილს, რომელმაც მერსისაიდულ დერბიში მუხლის ტრავმა მიიღო, სულ მცირე ორი კვირა გაუცდება, თუმცა დაზიანება სერიოზული არაა. ამის შესახებ ავტორიტეტული ბრიტანული გამოცემა The Athletic-ი იტყობინება.

მამარდაშვილი საავადმყოფოდან გაწერეს და ის ღრმა ჭრილობის მკურნალობას სახლში აგრძელებს. 25 წლის მეკარის მოედანზე დაბრუნების კონკრეტული ვადები არ სახელდება, მაგრამ საუკეთესო შემთხვევაში ეს შეიძლება 2 კვირაში მოხდეს, უარეს შემთხვევაში კი მამარდაშვილი თამაშს მხოლოდ 4 კვირაში შეძლებს.

„მადლობა ღმერთს, ყველაფერი კარგადაა. მადლობა ყველას მხარდაჭერისთვის, მალე დავბრუნდები“, - ასე მიმართა გულშემატკივრებს ქართველმა მეკარემ სოციალურ ქსელებში.

უახლოეს მატჩში „კრისტალ პალასთან“ „წითლების“ კარს 29 წლის ფრედი ვუდმენი დაიცავს. დიდი ალბათობით, მამარდაშვილი ასევე გამოტოვებს ვიზიტს „ოლდ ტრაფორდზე“ 3 მაისს. კითხვის ქვეშაა მისი თამაში 9 მაისს „ჩელსისთან“.

თუმცა, „ლივერპულისთვის“ სასიხარულო ამბავია ის, რომ „მანჩესტერ იუნაიტედთან“ მატჩში დაბრუნებას გეგმავს ალისონ ბეკერი, რომელსაც 18 მარტის შემდეგ არ უთამაშია.