შერმადინის მორიგი აღიარება | ქართველი ცენტრი ტურის MVP გახდა
„ტენერიფეს“ ქართველი ცენტრი, გიორგი შერმადინი, ესპანეთის საკალათბურთო ჩემპიონატის — ლიგა ACB-ის ტურის საუკეთესო მოთამაშე გახდა. „შერმინატორი“ მე-10 ტურის MVP-დ დაასახელეს, რომელშიც მისი სარგებლიანობის კოეფიციენტი 34 გახლდათ.
13 დეკემბერს „ტენერიფემ“ სტუმრად „ბრეოგანი“ დაამარცხა და იმ შეხვედრაში შერმადინმა 18 ქულა, 10 მოხსნა და 3 შედეგიანი გადაცემა მიითვალა. გიორგიმ ეს ჯილდო ახლა იმიტომ მიიღო, რომ იმ ტურის ერთი შეხვედრა — „გრან კანარიასა“ და „ბასკონიას“ შორის — გადაიდო და გასულ უქმეებზე ჩატარდა.
შერმადინი ლიგა ენდესას კვირის საუკეთესო კალათბურთელად 26-ედ დაასახელეს, რაც ყველა დროის რეკორდია. გარდა ამისა, გიორგი თვის MVP 14-ჯერ გამხდარა, ხოლო სეზონის საუკეთესო კალათბურთელის წოდება 2-ჯერ დაისაკუთრა.
ცნობისთვის,„ტენერიფეს“ 11 მოგება და 8 წაგება აქვს და სატურნირო ცხრილში მეშვიდე პოზიციას იკავებს. „შერმინატორის“ გუნდი მომდევნო შეხვედრას 14 თებერვალს გამართავს და „ბრეოგანს“ დაუპირისპირდება.
