შენგელიამ 10 ქულა ჩააგდო | ბარსელონა ელ კლასიკოში 19 ქულით დამარცხდა

თორნიკე შენგელიას „ბარსელონას“ 5-მატჩიანი წაუგებელი სერია შეწყდა. ევროლიგის ეგიდით, ქართველი კალათბურთელის გუნდი სტუმრად „რეალს“ დაუპირისპირდა და „ელ კლასიკოში“ უშანსოდ, 19 ქულით დამარცხდა — 61:80.

შენგელია თამაშში სათადარიგოთა სკამიდან ჩაერთო და პარკეტზე 21 წუთი და 16 წამი გაატარა. თორნიკემ 10 ქულა, 1 მოხსნა, 3 შედეგიანი გადაცემა და 1 ჩაჭრა მიითვალა. ქართველმა მძიმე ფორვარდმა 2-დან 1 ორქულიანი, 2-დან 2 სამქულიანი და 4-დან 2 საჯარიმო ჩააგდო. ბურთი ორჯერ დაკარგა და 3 პერსონალური ჯარიმა ჰქონდა.

„ბარსელონას“ რიგებში 10-ქულიანი ნიშნული შენგელიას გარდა მხოლოდ ნიკოლას ლაპროვიტოლამ და დარიო ბრისუელამ გადალახეს. ლაპროვიტოლას 12 ქულა ჰქონდა, ბრისუელას — 13. „რეალის“ რიგებში საუკეთესო უსმან გარუბა იყო — 16 ქულა, 3 მოხსნა.

ცნობისთვის, „ბარსელონას“ 14 მოგება და 8 წაგება აქვს და ევროლიგის სატურნირო ცხრილში მეექვსე პოზიციას იკავებს. „ბლაუგრანას“ მომდევნო შეხვედრა 18 იანვარს „სან პაბლო ბურგოსის“ წინააღმდეგ ელის.