რაიო ვალეკანოსთან მატჩს არ დაესწრებიან? | გრანადას ფანების პროტესტი

კოპა დელ რეის 1/16-ფინალში ლუკა გაგნიძის „გრანადა“ „რაიო ვალეკანოს“ დაუპირისპირდება. შეხვედრა 6 იანვარს გაიმართება და „როხიბლანკოს“ საშინაო სტადიონზე, თბილისის დროით, 22:00 საათზე დაიწყება.

Marca-ს ინფორმაციით, „გრანადას“ გულშემატკივართა ნაწილი მატჩისთვის ბოიკოტის გამოცხადებას აპირებს. ამის მიზეზი ბილეთების ფასებია. შეხვედრაზე დასასწრები ბილეთის ღირებულება 55-დან 80 ევრომდე მერყეობს, ხოლო სეზონური აბონემენტის მფლობელებს დამატებით 20 ევროს გადახდა მოუწევთ.

„გრანადას“ გულშემატკივართა ერთ-ერთმა გაერთიანებამ — Unión Granadinista-მ — ოფიციალური განცხადება გაავრცელა და ფანებს ბოიკოტისკენ მოუწოდა. გარდა ამისა, ორგანიზაციამ მშვიდობიანი აქციაც დააანონსა, რომელიც მატჩის დაწყებამდე გაიმართება და კლუბის ხელმძღვანელობის მუშაობის გაპროტესტებას ისახავს მიზნად.

ცნობისთვის, ლიგა 2-ის 19 ტურის შემდეგ „გრანადა“ გასავარდნ ზონაში იმყოფება. „როხიბლანკოსს“ 21 ქულა აქვს და ესპანეთის მეორე დივიზიონში მომდევნო შეხვედრას „ალმერიას“ წინააღმდეგ გამართავს.