ვის ჰყავს ყველაზე ძვირად შეფასებული შემადგენლობა | რომელზეა კვარას პარი სენ-ჟერმენი

Transfermarkt-მა დაასახელა კლუბები, რომლებსაც მისი მონაცემებით ყველაზე ძვირად ღირებული შემადგენლობა ჰყავთ. რეიტინგის პირველ ადგილს მადრიდის „რეალი“ იკავებს. „სამეფო კლუბის“ ფეხბურთელთა საბაზრო ღირებულების ჯამი Transfermarkt-ზე 1.38 მილიარდ ევროს შეადგენს.

მეორე პოზიციაზე „არსენალია“, რომლის მოთამაშეთა საერთო ღირებულება 1.29 მილიარდი ევროა. ლონდონური კლუბის შემდეგ პრემიერ ლიგის კიდევ ერთი წარმომადგენელია — „მანჩესტერ სიტი“ (1.19 მილიარდი ევრო).

ხვიჩა კვარაცხელიას „პარი სენ-ჟერმენი“ რეიტინგში მეოთხე ადგილზეა. ქართველი ფეხბურთელისა და მისი თანაგუნდელების საერთო ღირებულება 1.19 მილიარდ ევროს აღწევს. პსჟ-ის ყველაზე ძვირად შეფასებული ფეხბურთელები ვიტინია და ჟოაუ ნევეში არიან — თითოეული 110 მილიონი ევროდ, მესამე ადგილზე უსმან დემბელეა, ხოლო „კვარა“ მეოთხეა — 90 მილიონი ევრო.

ყველაზე ძვირად ღირებული შემადგენლობის მქონე კლუბების ხუთეულს „ჩელსი“ ასრულებს — 1.18 მილიარდი ევრო. აღნიშნული ხუთი გუნდის გარდა, მილიარდიან ნიშნულს კიდევ ორმა კლუბმა გადააჭარბა: „ბარსელონამ“ (1.12 მილიარდი) და „ლივერპულმა“ (1.04 მილიარდი).

მერვე, მეცხრე და მეათე ადგილებზე შესაბამისად „ბაიერნი“ (980.65 მილიონი), „ტოტენჰემი“ (878.5 მილიონი) და „მანჩესტერ იუნაიტედი“ (719.15 მილიონი) არიან.