ფრე ქართულ კლასიკოში - დამარცხებული და გადარჩენილი დინამო ბათუმი

Crystalbet ეროვნული საფეხბურთო ლიგის ბოლოსწინა, XXXV ტურის ცენტრალური შეხვედრა ბუნებრივია ქართულ საფეხბურთო რეალობაში ყველაზე პრინციპულ დაპირისპირებად მიჩნეული „დინამო თბილისი“ – „ტორპედო“ გახლდათ, რომელიც უხვგოლიანი აღმოჩნდა და საბოლოოდ 2:2 დასრულდა. მე-14 წუთზე მასპინძლები განელმა ლეგიონერმა ბარნს ოსეიმ ეფექტური დარტყმით დააწინაურა, რასაც სტუმრებმა პირველი ტაიმისთვის კომპენსირებულ დროში ბიორნ იონსენის ზუსტი 11-მეტრიანით უპასუხეს, რომლისთვისაც ეს მიმდინარე გათამაშებაში რიგით მე-20 გოლი იყო. 64-ე წუთზე ქუთაისელები ნიკა ნინუას ავტოგოლის შედეგად დაწინაურდნენ, თუმცა ეს გასამარჯვებლად საკმარისი არ აღმოჩნდა და ბოლო წუთზე „დინამო თბილისი“ ისევ განელმა ლეგიონერმა ნანა-კოფი დონკორმა გადაარჩინა და საბოლოო ანგარიში დააფიქსირა.

წყალტუბოში გამართული სატურნირო ცხრილში მეზობლად მყოფი კლუბების, „სამგურალისა“ და „დინამო ბათუმის“ შეხვედრა მასპინძელთა გამარჯვებით 4:0 დასრულდა. ლაშა შერგელაშვილმა ლამაზი სტანდარტული დარტყმით კიდევ ერთხელ გამოიჩინა თავი, გიორგი ფანცულაიამ მიმდინარე გათამაშებაში მე-17 გოლი გაიტანა, ხოლო თითო ბურთი გუნდის კაპიტნის, დემურ ჩიხლაძისა და ველისონის ანგარიშზეა. მარცხის მიუხედავად, ამ ტურის შემდეგ, „დინამო ბათუმმა“ ელიტაში ადგილი ოფიციალურად შეინარჩუნა, რაც ფინანსური პრობლემების გამო, ერთ დროს ჩემპიონობისთვის მებრძოლი ზღვისპირელების მთავარ მიზნად იყო ქცეული.

XXXV ტური ხვალ „გაგრა“ – „თელავის“ თამაშით დასრულდება, ხოლო Crystalbet ეროვნული საფეხბურთო ლიგის 2025 წლის სეზონი ბოლო ტურის მატჩებით 6 დეკემბერს დამთავრდება.