„მიზანი არ ჰქონდა, სიამოვნებისთვის თამაშობდა“ - კარლოსმა გაუჩოზე ისაუბრა

რონალდინიოზე როდესაც იწყება საუბარი, ფეხბურთის თითოეული გულშემატკივარი აღფრთოვანებით იხსენებს იმ პერიოდს, როდესაც გაუჩო ფორმის პიკზე იყო და მისი თამაშით დატკბობის საშუალება გვქონდა. სამწუხაროდ, ეს დრო დიდხანს არ გაგრძელდა და მან კრიშტიანუ რონალდუსა და ლიონელ მესის მსგავსად 20-წლიანი ფეერიული ასპარეზობა ვერ მოახერხა. რატომ უკლო თამაშის ხარისხს და რამ გამოიწვია მისი რეგრესი, ეს რონალდინიოს თანაგუნდელებზე უფრო კარგად არავინ იცის და შესაბამისად, ამ შეკითხვისთვის რობერტო კარლოსი ნამდვილად იდეალური რესპოდენტი გახლდათ, რომელიც მასთან ერთად ბრაზილიის ნაკრების ღირსებას წლების განმავლობაში იცავდა.

რობერტო კარლოსი

იცით, პრობლემა რაში მდგომარეობს? როდესაც ფორმის პიკზე გავიდა, მან ფეხბურთის თამაში სიამოვნებისთვის განაგრძო და არა როგორც პროფესიონალმა. გაუჩო ასე ფიქრობდა, გავაგრძელებ ასპარეზობას და ვნახოთ სადამდე შევძლებ, თუ არადა გავერთობი მაინც. ეს ყველაფერი კი მას უსაზღვრო პოტენციალის სრულად გამოვლენისთვის არ ეყო. დადგა მომენტი, როდესაც საკუთარ თავს უთხრა: „დავიღალე, მინდა უბრალოდ ფეხბურთის თამაში და დროის გატარება“.

გგონიათ წვეულებებზე დადიოდა და ვარჯიშს ნაკლებ დროს უთმობდა? არავითარ შემთხვევაში. უბრალოდ ასე აზროვნებდა, რომ მიაღწია ყველაფერს, ხალხს უყვარდა და ახლა დრო იყო ცხოვრებითა და თამაშით სიამოვნება მიეღო.

შეგახსენებთ, რომ რონალდინიოსთვის საუკეთესო „ბარსელონაში“ გატარებული პერიოდი გახლდათ, როდესაც ესპანეთის ლა ლიგაში და ჩემპიონთა ლიგაში გამარჯვების შემდეგ, ყველაზე პრესტიჟული ინდივიდუალური საფეხბურთო ჯილდო, „ოქროს ბურთიც“ მოიგო.