ალისონი ჩელსისთან მატჩსა და სანაკრებო შეხვედრებს გამოტოვებს

ალისონ ბეკერი გამოტოვებს როგორც „ჩელსისთან“ შეხვედრას, ისე სანაკრებო თამაშებს. ინფორმაციას Sky Sports-ი ავრცელებს.

„ლივერპულის“ სამედიცინო შტაბი ბრაზილიელი მეკარის მდგომარეობას დამატებით გამოიკვლევს და ამის შემდეგ გადაწყვეტს, როდის შეძლებს ის დაბრუნებას მოედანზე.

ალისონმა ტრავმა „გალათასარაისთან“ მატჩში მიიღო, რის შემდეგაც კარში გიორგი მამარდაშვილი ჩადგა.

„ჩელსისთან“ მატჩი 4 ოქტომბერს არის დაგეგმილი, ხოლო ბრაზილიის ნაკრებს 10 და 14 ოქტომბერს ამხანაგური თამაშები ელის სამხრეთ კორეისა და იაპონიის წინააღმდეგ.

დიდი ალბათობით, „ჩელსისთან“ მატჩში „ლივერპულის“ კარს გიორგი მამარდაშვილი დაიცავს – ეს მისთვის პირველი გამოცდილება იქნება ინგლისის პრემიერლიგაში.

ცნობისთვის, 2 ტურის შემდეგ, ჩემპიონთა ლიგის ფაზაზე მერსისაიდულ გრანდს 3 ქულა აქვს. შემდეგ ტურში სლოტის გუნდი ფრანკფურტის „აინტრახტს“ ესტუმრება.

შეგახსენებთ, რომ მამარდაშვილმა „ლივერპულთან“ კონტრაქტი გასული წლის ზაფხულში გააფორმა, განვლილი სეზონი კი იჯარით „ვალენსიაში“ ჩაატარა.