7 ტურით ადრე | კახა ცხადაძემ გაბალა უმაღლეს დივიზიონში დააბრუნა

კახაბერ ცხადაძის „გაბალა“ აზერბაიჯანის უმაღლეს დივიზიონში, პრემიერ ლიგაში დაბრუნდა. პირველი ლიგის მეოცე ტურში, „გაბალა“ „ბაქუ სპორტინგს“ სტუმრად დაუპირისპირდა და მეტოქე 5:0 გაანადგურა, რის შემდეგაც, საგზური გაინაღდა.

პირველი ლიგის მიმდინარე სეზონის დასრულებამდე კიდევ 7 ტურია დარჩენილი, მაგრამ „გაბალას“ დაწევის შანსი არავის აქვს. ცხადაძის გუნდი ფენომენალურად გამოიყურება და 20 შეხვედრიდან 16 მოიგო, 4-ჯერ ფრეს დასჯერდა და ჯერჯერობით, დაუმარცხებელია.

განსაკუთრებული აღნიშვნის ღირსია „გაბალას“ დაცვა. აზერბაიჯანულ კლუბს, საკუთარ მოედანზე გოლი არ გაუშვია, თავად კი 15 ბურთი შეაგდო. სტუმრად გამართულ შეხვედრებში, „გაბალას“ კარი 4-ჯერ აიღეს, ცხადაძის ბიჭებმა კი 26 გოლი გაიტანეს.

ცნობისთვის, ცხადაძემ „გაბალა“ 2024 წლის თებერვალში ჩაიბარა და გუნდი პრემიერ ლიგიდან გავარდნას ვერ გადაარჩინა, თუმცა, უმაღლეს დივიზიონში მალევე დაბრუნდა.