„დასაკარგი არაფერი აქვთ“ | ტოსუნი საქართველოს ნაკრებსა და ევრო 2024-ზე

თურქეთის ნაკრების ერთ-ერთმა ლიდერმა, ჯენკ ტოსუნმა ევროპის ჩემპიონატსა და მისი გუნდის მეტოქეებზე ისაუბრა. ტოსუნის თქმით, თურქეთს გოლების გატანის პრობლემა არ ექნება და მას და მის თანაგუნდელებს სჯერათ, რომ მიზნის მიღწევა შეუძლიათ.

„არ მინდა, რომელიმე მეტოქე სათანადოდ ვერ დავაფასო. საქართველო დიდ ტურნირზე პირველად იასპარეზებს და მათ დასაკარგი არაფერი აქვთ. პორტუგალიაზე საუბარი საჭირო არაა, რადგან სელესაო ტურნირის ფავორიტთა შორისაა. ჩეხეთის ნაკრებს რაც შეეხება, ჩეხეთი კარგი გუნდია, რომელიც ყველა დიდ ტურნირზე თამაშობს. ასე რომ, მარტივი ჯგუფი არ გვაქვს, მაგრამ ჩვენი შესაძლებლობების გვჯერა.

გულშემატკივრებს სერიოზული მოლოდინები აქვთ და ეს ჩვენზე წნეხს ვერ ახდენს, მაგრამ გვინდა, თითოეულ მატჩს ინდივიდუალურად მივუდგეთ. იმედი გვაქვს, ბრწყინვალე შედეგამდე ნაბიჯ-ნაბიჯ მივალთ. თურქეთის ნაკრებს გოლების გატანის პრობლემა არ აქვს. მოსამზადებელი და საკვალიფიკაციო ეტაპების ჩათვლით, 20 გოლი გავიტანეთ და თავი 17-მა ფეხბურთელმა გამოიჩინა. გოლის გატანა მხოლოდ თავდამსხმელებს კი არა, ყველას შეუძლია და ვფიქრობ, ამ მხრივ, არ გაგვიჭირდება“.

როგორც მოგეხსენებათ, თურქეთის ნაკრები ევროპის ჩემპიონატს 18 ივნისს ქართველებთან შეხვედრით იწყებს. 22-ში მათი მეტოქე პორტუგალიაა, ხოლო დასკვნით შეხვედრაში ჩეხეთს დაუპირისპირდებიან.