2 მატჩი მისცეს - ფლიკი შესაძლოა გერმანიის ნაკრებიდან დაითხოვონ
ჰანს-დიტერ ფლიკმა შესაძლოა გერმანიის ნაკრების მთავარი მწვრთნელის პოსტი შემოდგომაზე დატოვოს.
Bild-ის ცნობით, გუნდის შედეგები გერმანიის ფეხბურთის ასოციაციაში 58 წლის სპეციალისტთან ერთად განიხილეს. ბოლო 4 მატჩის განმავლობაში ეროვნულ ნაკრებს ერთი გამარჯვებაც არ ჰქონია, გუნდი ექსპერიმენტებისა და ცვალებადი შემადგენლობის გამო გააკრიტიკეს.
DFB-ის პრეზიდენტმა ბერნდ ნოიენდორფმა გადაწყვიტა მწვრთნელს შანსი მისცეს და კიდევ ორი მატჩი ჩაატარებინოს - იაპონიასთან და საფრანგეთთან სექტემბერში. ამ დროის განმავლობაში, ფლიკმა უნდა დაამტკიცოს, რომ მას ევრო 2024-ის წინ კონკურენტუნარიანი გუნდის შეკრება შეუძლია.
მთავარი მწვრთნელის პოსტზე შესაძლო კანდიდატებს შორის იულიან ნაგელსმანი, ოლივერ გლასნერი, შტეფან კუნცი და გერმანიის ნაკრების მენეჯერი რუდი ფიოლერიც კი განიხილება.