Goal-მა ოქროს ბურთის რეიტინგი განაახლა | კვარა ერთი საფეხურით დაქვეითდა

გავლენიანმა გამოცემამ, Goal.com-მა 2023 წლის ოქროს ბურთის რეიტინგი განაახლა. ცვლილებები შეეხო „ნაპოლის“ ქართველ ფეხბურთელს, ხვიჩა კვარაცხელიას, რომელიც ბოლო მონაცემებით, მე-7 პოზიციას იკავებდა, ახალ რეიტინგში კი ერთი საფეხურით დაქვეითდა.

„კვარადონა 2023 წელს ისეთ ფორმაში აღარაა, როგორშიც 2022 წელს იყო, მაგრამ 33-წლიანი პაუზის შემდეგ მოგებულ სკუდეტოში შეტანილი წვლილის გამო, ნაპოლის გულშემატკივრებს ეს დიდად არ ადარდებთ. ქართველი შემტევი ევროპული ფეხბურთის მიმდინარე სეზონის ერთ-ერთი საუკეთესო ტრანსფერია და ევროპაში ერთ-ერთ ყველაზე რთულად ასაყვან გარემარბად რჩება“, - წერს GOAL.

ცნობისთვის, ხვიჩა მე-7 პოზიციას იკავებდა და მას „მანჩესტერ სიტის“ ფეხბურთელმა, კევინ დე ბრუინმა გადაასწრო. ბელგიელის გარდა, „კვარაზე“ წინ ვიქტორ ოსიმენი (მეექვსე), კარიმ ბენზემა (მეხუთე), ვინისიუს ჟუნიორი (მეოთხე), კილიან მბაპე (მესამე), ერლინგ ჰოლანდი (მეორე) და ლიონელ მესი (პირველი) იმყოფებიან.

შეგახსენებთ, რომ მიმდინარე სეზონში ქართველმა ფეხბურთელმა „ნაპოლის“ მაისურით ყველა ტურნირზე 39 მატჩი ჩაატარა, რომელშიც 14 გოლი გაიტანა და 14 საგოლე გადაცემა შეასრულა.