მამარდაშვილის ფანტასტიკური რეაქცია - ვალენსია უშანსოდ დამარცხდა

ესპანეთის ლა ლიგის 26-ე ტურში მადრიდის „ატლეტიკომ“ შინ „ვალენსია“ 3:0 დაამარცხა.

„ღამურების“ ქართველმა მეკარემ, გიორგი მამარდაშვილმა ბრწყინვალედ ითამაშა. განსაკუთრებით აღსანიშნავია პირველი ტაიმის მე-20 წუთზე შექმნილი მომენტი, როცა მამარდაშვილმა ბრწყინვალე რეაქციით მემფის დეპაის დარტყმული ბურთი დაიჭირა. ამ მატჩში საქართველოს ეროვნული ნაკრების მეკარის აქტივში 3 „სეივი“ იყო, თუმცა ყველაზე გამოსარჩევი აღნიშნული ეპიზოდია.

რუბენ ბარახას გუნდის დაცვის თამაში კრიტიკას ვერ უძლებს, „ვალენსია“ საკმაოდ სუსტად გამოიყურებოდა და გაშვებულ გოლებში ქართველის დადანაშაულება სრულიად უსაფუძვლოა.

22 წლის ქართველმა მეკარემ ლა ლიგის მიმდინარე სეზონში 26-ვე მატჩი სასტარტოში შეუცვლელად ჩაატარა. მის აქტივში 5 მშრალი მატჩია. გარდა ამისა, ესპანეთის თასზე 3-დან ორ შეხვედრაში გოლი არ გაუშვია. ასე რომ, საერთო ჯამში ამ სეზონში 7 მშრალი შეხვედრა დააგროვა, რაც აუტსაიდერი გუნდის მეკარისთვის საკმაოდ კარგი შედეგია.

ლა ლიგის მიმდინარე სეზონში „ვალენსიამ“ 26 ტურში 26 ქულა დააგროვა, მე-17 ადგილზეა, თუმცა ამდენივე ქულაა მე-18 პოზიციაზე მყოფი „ხეტაფესა“ და მე-19 ადგილზე მყოფი „ალმერიას“ აქტივში. „ხეტაფემ“ ერთით ნაკლები შეხვედრა ჩაატარა, თუ 26-ე ტურში „სევილიასთან“ საშინაო შეხვედრაში ქულას მაინც აიღებს, მამარდაშვილის გუნდი გასავარდნ ზონაში აღმოჩნდება.