„განსაკუთრებული ფეხბურთელია“ - Marca-ს მაგარი სტატია კვარაზე
„ფეხბურთელი, რომელიც 100 მილიონზე მეტი ღირს და მთელ ევროპას ჯადოს უკეთებს“, - ასეთია Marca-ს მიერ გამოქვეყნებული სტატიის სათაური და ალბათ, არ გაგიჭირდებათ მიხვედრა, რომ ესპანური გამოცემა „ნაპოლის“ ქართველ შემტევზე, ხვიჩა კვარაცხელიაზე საუბრობს.
„პატარა მიღწევა არაა, როცა შენს სახელსა და დიეგო არმანდო მარადონას ერთ წინადადებაში ახსენებენ. ხვიჩა კვარაცხელიამ ამას ფაქტობრივად ნახევარ სეზონში მიაღწია და მის მეტსახელში დიეგოს გვარის ნაწილიც ფიგურირებს - „კვარადონა“. არგენტინელის ნეაპოლური თავგადასავლიდან 30 წელია გასული და სამხრეთ იტალიაში მდებარე ქალაქს ახალი კუმირი ჰყავს. გარემარბი, რომელსაც ვიქტორ ოსიმენთან ერთად, ნაპოლი მე-3 სკუდეტომდე და ჩემპიონთა ლიგამდე მიჰყავს, სადაც არავინ იცის, ნეაპოლელთა ლიმიტი რა არის.
„ძლიერი გუნდი გვყავს, მაგრამ ჩემპიონთა ლიგა არის ტურნირი, რომელზეც მსოფლიოს საუკეთესო კლუბები თამაშობენ. ვფიქრობ, ნაპოლის ჩემპიონთა ლიგის მოგება შეუძლია და ამაში ბუკმეკერებიც მეთანხმებიან, რომლებსაც პარტენოპეი მე-4 თუ მე-5 ფავორიტად ჰყავთ“, - განუცხადა დე ლაურენტისმა BILD-ს რამდენიმე კვირის წინ. კვარაცხელიათი ნაპოლის პრეზიდენტიც მოხიბლულია. მან თავის მარჯვენა ხელს, კრისტიანო ჯუნტოლის სრულო ნდობა გამოუცხადა და ზაფხულში წასული მერტენსისა და ინსინიეს ნაცვლად, დინამო ბათუმიდან ფეხბურთელი შეიძინა, რომელსაც მაშინ ძალიან ცოტა იცნობდა.
„დიმაროში გატარებული წინასასეზონო პერიოდისას, კვარაცხელიას თამაში უდიდესი ინტერესის საგანი იყო. ზაფხულში, კლუბი ბევრმა ფეხბურთელმა დატოვა და ქომაგები იმედგაცრუებული იყვნენ. ხვიჩას ტრანსფერმა მოლოდინი შექმნა და პირველი ამხანაგური მატჩებისადმი უდიდესი ყურადღება იყო მიპყრობილი, თუმცა ასეთ თამაშს არავინ ელოდა“, - უხსნის Marca-ს Calcionapoli24-ის ჟურნალისტი, კლაუდიო რუსო. ნაპოლიმ კვარაცხელიას ტრანსფერი ივლისის პირველ დღეს გამოაცხადა, მაგრამ მასთან ყველაფერი რამდენიმე თვით ადრე შეათანხმა, რადგან კონკურენციას ელოდა ფეხბურთელთან დაკავშირებით, რომელიც იუვენტუსსა და ვალენსიას შესთავაზეს. კვარას შესახებ ცოტა რამ ჩვენც ვიცოდით. 2021 წლის მარტში, ესპანეთთან ნაჩვენები თამაშით მან საკუთარი დონე დაგვანახა და ოდესღაც, ისიც თქვა, რომ რეალის გულშემატკივარია.
ნაპოლიმ მის სანაცვლოდ 10 მილიონი ევრო გადაიხადა და რამდენიმე დღის წინ, მისი ყოფილი გუნდის, რუბინის Tiktok გვერდმა იუვენტუსს დასცინა, რადგან ბებერ ქალბატონს ხვიჩას სანაცვლოდ 20 მილიონი ევრო ეძვირა. კვარაცხელიაში გადახდილი 10 მილიონი წარსულშია დარჩენილი. 12 გოლი და 14 ასისტი სადებიუტო სეზონში, რის შემდეგაც მისი ღირებულება რამდენჯერმე გაიზარდა და დე ლაურენტისი მის გაშვებას არ აპირებს. ქართველ ფეხბურთელს კლუბთან კონტრაქტი 2027 წლამდე აკავშირებს და ნაპოლი ხელშეკრულების გახანგრძლივებას გეგმავს, რაც ხელფასის მომატებასაც გულისხმობს.
„რეალი? დიახ, სხვა კლუბების მხრიდან დიდი ინტერესია. კვარა ამჟამად მხოლოდ სკუდეტოსა და ჩემპიონთა ლიგაზე ფიქრობს, ის მხოლოდ ნაპოლისთან ერთად მატჩების მოგებაზე ფიქრობს. კვარას ნეაპოლი უყვარს. იქ ყოფნა უყვარს. მან მითხრა, რომ იტალიაში საფეხბურთო თვალსაზრისით, საკუთარ თავს მხოლოდ ნეაპოლში ხედავს. ნაპოლის გარდა, იგი სხვა იტალიურ კლუბში არასდროს ითამაშებს. ნეაპოლში ხვიჩა თავს ისე გრძნობს, როგორც საკუთარ სახლში“, - ამბობს მისი აგენტი, მამუკა ჯუღელი Calcionapoli24-თან საუბრისას. რეალურად, ვერც ერთი იტალიური კლუბი ვერ გადაიხდის თანხას, რაც ქართველი ფეხბურთელი ახლა ღირს. 100 მილიონი? ყოველი დღისა და ნაპოლის ყოველი მატჩის შემდეგ, დე ლაურენტისი მის ფასს ზრდის.
თებერვლის დასაწყისში, OPTA-მ მოგვაწოდა ინფორმაცია, რომელიც კვარაცხელიას განზომილებებს კარგად აღწერს. იგი ევროპის ტოპ 5 ლიგაში ერთ-ერთია იმ 5 ფეხბურთელთა შორის, რომლებსაც 10 გოლი და 10 საგოლე გადაცემა აქვთ. მის გარდა, იგივე სტატისტიკა მესის, ნეიმარს, კოლო მუანისა და გნაბრის დაუფიქსირებიათ და ხვიჩა მათ შორის ყველაზე ახალგაზრდაა. კვარაცხელია განსაკუთრებული ფეხბურთელია და დღესდღეობით, ბევრ მისნაირ მოთამაშეს ვერ შეხვდებით. დრიბლიორი, მეტოქეზე წამსვლელი და ერთ-ერთი, რომელიც მოწინააღმდეგეებში შიშს აჩენს და მათ აიძულებს, უკან დაიხიონ. გარემარბი, რომელიც ჩამოწეული გამაშებით თამაშობს და მატჩის ბედის გადაწყვეტა შეუძლია. ჩემპიონთა ლიგა მისი ვარსკვლავური სტატუსის საბოლოო ტრამპლინია. ჯგუფურ ეტაპზე მან უკვე გაიბრწყინა და 2 გოლი და 3 საგოლე გადაცემა მიითვალა. კვარაცხელიამ შესანიშნავი შეხვედრები ჩაატარა, რომელთა შორის ლივერპულთან გამართული ბრწყინვალე მატჩიც იყო. ტრენტ ალექსანდერ-არნოლდს ახლაც კოშმარები აწუხებს“, - წერს ესპანური გამოცემა.
შეგახსენებთ 23 ტურის შემდეგ, „ნაპოლი“ იტალიის სერია A-ს სატურნირო ცხრილში 62 ქულით პირველ ადგილს იკავებს და უახლოეს მდევარ „ინტერს“ 15 ქულით უსწრებს. კვარაცხელიასა და ოსიმენის დუეტს რამდენიმე საათში ვიხილავთ, როცა ჩემპიონთა ლიგაზე, „ნაპოლი“ სტუმრად „აინტრახტს“ დაუპირისპირდება.
