საბას რამდენიმე მსურველი ჰყავს | ტრაბზონსპორის ვარიანტი გამოირიცხა

საქართველოს ნაკრების ფეხბურთელის, საბა ლობჟანიძის „ჰატაისპორი“ თურქეთის ჩემპიონატის მიმდინარე სეზონს ჩაეხსნა. იწერებოდა, რომ 28 წლის გარემარბით რამდენიმე თურქული კლუბი ინტერესდებოდა და ერთ-ერთი მათგანი „ტრაბზონსპორი“ გახლდათ, თუმცა ეს ვარიანტი რეალური არ აღმოჩნდა.

Crystalsport-ის ინფორმაციით, გამორიცხულია, საბამ თურქეთის მოქმედ ჩემპიონს მიაშუროს და ამ ეტაპზე, ბევრი რამ კითხვის ნიშნის ქვეშაა. როგორც მოგეხსენებათ, „ტრაბზონსპორის“ გარდა, ლობჟანიძე „ფენერბაჰჩესა“ და „ანკარაგიუჯუს“ დაუკავშირეს და მისი მომდევნო კლუბის ვინაობა უახლოეს დღეებში უნდა გაირკვეს.

შეგახსენებთ, რომ საბა ლობჟანიძემ მიმდინარე სეზონში თურქეთის სუპერლიგაში, „ჰატაისპორის“ რიგებში 21 მატჩი ჩაატარა, მის აქტივში 1 გოლი და 4 საგოლე პასია. საქართველოს ეროვნული ნაკრების შემტევს თურქულ კლუბთან მოქმედი კონტრაქტი 2024 წლის ივნისამდე აკავშირებს.

მოგეხსენებათ, თურქეთში ძლიერი მიწისძვრა მოხდა, რომელმაც ქალაქ ჰატაის უდიდესი ზიანი მიაყენა. საბა ლობჟანიძის კლუბმა „ჰატაისპორმა“ სუპერლიგაში ასპარეზობა ამ მიზეზით შეწყვიტა. თავდაპირველად, 7.8 მაგნიტუდის მიწისძვრა თურქეთსა და სირიაში 6 თებერვალს მოხდა. რამდენიმე საათის შემდეგ რეგიონში მიწისძვრა განმეორდა, ამჯერად 7.7 მაგნიტუდის. ამ ეტაპზე არსებული ინფორმაციით, ორივე ქვეყანაში დაღუპულთა რაოდენობამ 44 000-ს გადააჭარბა.