გუარდიოლა: „მჯერა, გაგვამართლებენ, სიტი უდანაშაულოა“

„მანჩესტერ სიტის“ მთავარმა მწვრთნელმა, პეპ გუარდიოლამ იმ ბრალდებებზე ისაუბრა, რომლებიც პრემიერ ლიგამ „ქალაქელებს“ წაუყენა. ესპანელმა სპეციალისტმა საკუთარ კლუბს მხარი დაუჭირა და განაცხადა, რომ „სიტის“ უდანაშაულობაში ეჭვი არ ეპარება.

„როცა ბრალდებების შესახებ გავიგე, პირველი, რაც გავიფიქრე, იყო ის, რომ ჩვენ უკვე დამნაშავედ გამოგვაცხადეს. იგივე მოხდა უეფასთან მიმართებით და ეგრევე დამნაშავეებად მოგვნათლეს. მაშინ კლუბმა დაამტკიცა, რომ უდანაშაულოები ვიყავით და თქვენ მშვენივრად მოგეხსენებათ, ვის მხარეზე ვარ.

საბედნიეროდ, ვცხოვრობთ ქვეყანაში, სადაც ყველა უდანაშაულოა, სანამ საპირისპიროს არ დაამტკიცებენ, თუმცა, მრჩება შთაბეჭდილება, რომ უკვე გაგვასამართლეს და დამნაშავედ გამოგვიყვანეს. არ ვიცი, რა მოხდება. ვფიქრობ, კარგი იურისტები გვყავს და ჩვენს პოზიციას ბოლომდე დავიცავთ. ვნახოთ, პრემიერ ლიგა რას გადაწყვეტს და ჩემი აზრით, უდანაშაულოები ვართ. ბოლომდე დარწმუნებული ვარ, რომ გაგვამართლებენ. გარწმუნებთ, რომ წასვლას არ ვაპირებ. ახლა სიტიში დარჩენა უფრო მეტად მინდა, ვიდრე ოდესმე. ზოგჯერ, ეჭვები მიჩნდება, მაგრამ ამ წუთისთვის, არსად წასვლას არ ვაპირებ".

შეგახსენებთ, რომ თუ ფინანსური დარღვევების დამტკიცება მოხდება, მანჩესტერული კლუბი შესაძლოა, პრემიერ ლიგიდან გააგდონ ან ქულები ჩამოაკლონ. ამასთან, არის შანსი, კომისიამ პრემიერ ლიგის ხელმძღვანელებს რეკომენდაცია მისცეს, რომ რამდენიმე მატჩის გადათამაშება მოხდეს და „ქალაქელებს“ კომპენსაციის გადახდა დაეკისროთ. Sky Sports-ის ინფორმაციით, გამორიცხული არაა, რომ კომისიამ რამდენიმე ფეხბურთელის რეგისტრაცია გააუქმოს ან კლუბს ახალი მოთამაშეების რეგისტრაციაზე უარი უთხრას.