„პატარა საქართველოს დიდი წინსვლა აქვს“ – Areanapoli-ის სტატია გიორგი კვერნაძეზე

„დინამო ბათუმის“ ფეხბურთელმა, გიორგი კვერნაძემ „შტურმს“ ლამაზი გოლი გაუტანა, რომლის შემდეგაც, იტალიური პრესა მასზე ალაპარაკდა. Calcionapoli-ისა და Napolipiu-ს სტატიები უკვე გაგაცანით, ახლა კი მასზე და ქართულ ფეხბურთზე AreaNapoli-იმ დაწერა.

„პატარა საქართველოს საფეხბურთო სამყაროში დიდი ზრდა აქვს. ქართველი ტალანტების რაოდენობა მატულობს და ისინი ტოპ ევროპულ კლუბებში არიან მიმოფანტული. როგორც ჩანს, ნაპოლის სურს, ამ ტალღას გაჰყვეს. საქართველოს ჩემპიონატის ორი მთავარი წარმომადგენელი დინამო თბილისი და დინამო ბათუმი არიან და ნიჭიერ ქართველ ფეხბურთელებს სწორედ ისინი ზრდიან. საქართველოს ნაკრებსაც დიდი ამბიციები აქვს და მისი მიზანია, მომდევნო ევროპის ჩემპიონატზე იასპარეზოს.

ხვიჩა კვარაცხელიას წყალობით მოხდენილი გადატრიალების შემდეგ, ლურჯებს სურთ, იგივე გაიმეორონ. საუბარი გვაქვს გიორგი კვერნაძეზე, რომელიც ნაპოლის შემტევზე 2 წლით პატარაა. როგორც ვიდეოებიდან ჩანს, ქართველ ტალანტს შესანიშნავი ტექნიკა აქვს. ის კვარას ყოფილ კლუბში, დინამო ბათუმში თამაშობს და შტურმთან გამართულ ამხანაგურ შეხვედრაში შესანიშნავი გოლი გაიტანა“, - წერს იტალიური გამოცემა.

შეგახსენებთ, რომ კვერნაძე „საბურთალოს“ აღზრდილია, 2021 წლის კრისტალბეთ ეროვნული ლიგის სეზონი იჯარით „თელავში“ გაატარა, 21 თამაშში 3 გოლი შეაგდო და 2 საგოლე პასი შეასრულა. წარსულში მას „ნაპოლის" უკავშირებდნენ და ვნახოთ, მოვლენები როგორ განვითარდება.