“გადაუგდეთ ბურთი და მომენტს შექმნიან“ - სპალეტიმ ხვიჩა და სალაჰი შეადარა

ჩემპიონთა ლიგის ბოლო ტურში ცენტრალური დაპირისპირებაა. „ლივერპული“ „ნაპოლის“ უმასპინძლებს. მატჩის წინ, „პარტენოპეის“ მთავარმა მწვრთნელმა ლუჩიანო სპალეტიმ ჟურნალისტებთან ისაუბრა.

სპალეტი:

„კვარაცხელია და სალაჰი? ისინი არიან მოთამაშეები, რომლებიც სხვადასხვა გზით ახერხებენ ბრწყინვალე თამაშს. თქვენ შეგიძლიათ მათ ბურთი გადაუგდოთ და ისინი მომენტს შექმნიან. ისინი ძალიან მარტივად თამაშობენ. დამიზნება, მოწინააღმდეგისკენ გიჟური სისწრაფით მიდიან და ამ სისწრაფის დროს ბრწყინვალედ მოქმედებენ. ისინი ხვალ, სწორედ ასე მოიქცევიან.

ვფიქრობ, „ლივერპული“ 4:0-ის მოგებაზე არ ფიქრობს. ზუსტად ეს თქვა კლოპმაც და ამან ჩემი აზრები უფრო გაამყარა. იურგენმა ბევრი კომპლიმენტი თქვა ჩემზე და ამისთვის დიდ მადლობას ვუხდი. ასევე ვფიქრობ, რომ „ლივერპულის“ სტილი არ გადაგვიღია. კლოპი მსოფლიოში ერთ-ერთი საუკეთესო მწვრთნელია და მისი გუნდის შედეგებმა ეს დაადასტურეს.

„ლივერპულის“ ბოლო მატჩის შედეგები არაფერს ნიშნავს. ამაზე აქცენტი არ უნდა გავაკეთოთ. ისინი ძალიან ძლიერები არიან და გამარჯვებისთვის ყველაფერს გააკეთებენ. ხვალინდელ მატჩში იქნება მომენტები, როდესაც ჩვენ მოწინააღმდეგეს სისწრაფეში უნდა ავყვეთ და ამ დროს უდიდესი ხარისხის გამოვლენა დაგვჭირდება. მოწინააღმდეგეს ჩვენი ინტენსივობა უნდა მოვახვიოთ.

2 თვის წინ, რომ გეკითხათ, ვერ წარმოვიდგენდი, რომ დღეს აქ 15 ქულით ლიდერები ვიქნებოდით. ეს კიდევ ერთხელ ადასტურებს იმას, რომ „ნაპოლი“ სწორად მუშაობს, სწორად ვითარდება და გუნდში ყველაფერი იდეალურად არის. ჩემი ბიჭებისგან ყოველთვის მაქსიმუმს ვითხოვ.“

შეგახსენებთ, რომ ჯგუფს 15 ქულით „ნაპოლი“ ლიდერობს, ხოლო „ლივერპულს“ 12 ქულა აქვს და მეორე პოზიციაზე იმყოფება. იმისათვის, რომ მერსისაიდულმა გრანდმა ჯგუფში პირველი ადგილი დაიკავოს, „პარტენოპეის“ 4 ბურთით დამარცხება სჭირდება. აღნიშნული დაპირისპირება 1 ნოემბრით თარიღდება და თბილისის დროით 23:55-დან დაიწყება.

ასევე შეგახსენებთ, ამ გუნდების პირველი დაპირისპირება ნეაპოლში გაიმართა და მასპინძლებმა 4:1 გაიმარჯვეს. გამორჩეული შეხვედრა ჰქონდა ხვიჩა კვარაცხელიას, რომელმაც საგოლე პასი გააკეთა და მთელი მატჩის განმავლობაში აქტიური იყო.