სენსაცია ზაგრებში - მარგველაშვილის წარმატებული მატჩი ჩემპიონთა ლიგაზე

UEFA-ს ჩემპიონთა ლიგის 2022-22 წლების სეზონის მეორე საკვალიფიკაციო ეტაპზე ''ყარაბაღმა'' შინ შვეიცარიის ჩემპიონი ''ციურიხი'' 3:2 დაამარცხა. გამარჯვებულთა შემადგენლობაში ქართველ მეკარეს, ლუკა გუგეშაშვილს არ უთამაშია, სათადარიგოთა სკამზე იჯდა. საპასუხო მატჩი 27 ივლისს შვეიცარიაში გაიმართება.

UEFA-ს ჩემპიონთა ლიგის მეორე საკვალიფიკაციო ეტაპზე ჩრდილოეთ მაკედონიის ჩემპიონი ''შკუპი'', რომლის შემადგენლობაში გაგი მარგველაშვილი ირიცხება, ზაგრების ''დინამოს'' სტუმრად დაუპირისპირდა. ანგარიში ''შკუპიმ'' გახსნა, 25-ე წუთზე ბრაზილიელმა კუევენმა სტუმრები დააწინაურა, 44-ე წუთზე არიან ადემიმ ანგარიში გაათანაბრა.

მეორე ტაიმში ზაგრების ''დინამო'' დიდ უპირატესობას ფლობდა, 86-ე წუთზე პეტკოვიჩმა მასპინძლები დააწინაურა, თუმცა 89-ე წუთზე რენალდუ კეპასმა ''შკუპი'' მარცხისგან იხსნა. მატჩი ფრედ 2:2 დასრულდა.

''შკუპის'' ქართველმა ცენტრალურმა მცველმა გაგი მარგველაშვილმა სასტარტოში შეუცვლელად ითამაშა. საპასუხო შეხვედრა 26 ივლისს გაიმართება.

ამ სტადიონზე მარგველაშვილმა 2019-20 წლების ჩემპიონთა ლიგის მეორე  საკვალიფიკაციო ეტაპზე ''საბურთალოს'' მაისურით ითამაშა. ის შეხვედრა ზაგრების ''დინამოს'' გამარჯვებით 3:0 დასრულდა. მარგველაშვილმა 90 წუთი ითამაშა. გოლები ორშიჩმა, ბრუნო პეტკოვიჩმა და დანი ოლმომ გაიტანეს. მარგველაშვილმა ორშიჩისა და პეტკოვიჩის წინააღმდეგ დღევანდელ შეხვედრაშიც ითამაშა.