საბურთალო და ლოკომოტივი საშინაო არენას იცვლიან - მიხეილ მესხის სტადიონის რეკონსტრუქცია იწყება
მთავრობის განკარგულებით, 21-წლამდე ევროპის ჩემპიონატის საქართველოში ჩასატარებლად, „სპორტული ინფრასტრუქტურის განვითარების პროგრამის" ფარგლებში, თბილისში, საგურამოში, ქუთაისში, წყალტუბოში, ქობულეთსა და ბათუმში სპორტული ინფრასტრუქტურის რეაბილიტაცია-მოწყობას იწყებს.
პროგრამა სახელმწიფო ბიუჯეტიდან დაფინანსდება და მისი სავარაუდო ღირებულება 100 მილიონი ლარია. პროგრამის ფარგლებში დაგეგმილია როგორც სავარჯიშო მოედნების რეკონსტრუქცია-რეაბილიტაცია, ისე ახალი სტადიონების პროექტირება-მშენებლობა.
აღნიშნული გეგმის გათვალისწინებით, საბურთალოს საშინაო არენის შეცვლა უწევს:
დედაქალაური საბურთალო, რომელიც საშინაო მატჩებს მიხეილ მესხის ცენტრალურ სტადიონზე მართავდა, ამიერიდან გუნდებს რუსთავში, საქართველოს ფეხბურთის ფედერაციის ტექნიკურ ცენტრში უმასპინძლებს.
გეცოდინებათ, რომ 2023 წელს საქართველო ევროპის ახალგაზრდულ ჩემპიონატს მასპინძლობს. ერთ-ერთი სტადიონი, სადაც ოფიციალური მატჩები გაიმართება, მიხეილ მესხის სახელობის არენაა. აქედან გამომდინარე, აღნიშნული სტადიონის რეკონსტრუქცია დაიწყო, რის გამოც, ჩვენს კლუბს დროებით საშინაო არენის შეცვლა მოუხდა", - განმარტავენ კლუბში.
ფოტო: საქართველოს ფეხბურთის ფედერაცია
მიხეილ მესხის სტადიონის გარდა, საშინაო არენას შეიცვლის თბილისის ლოკომოტივიც, რომელიც მესხი 2-დან კვლავ საგურამოში დაბრუნდება.
საქართველოს კრისტალბეთ ეროვნული ლიგის მე-12 ტურში საბურთალოს მატჩი ქუთაისში აქვს ჩანიშნული, ხოლო ლოკომოტივს - გაგრას წინააღმდეგ, დინამო არენაზე, მე-13 ტურიდან კი სიახლე ძალაში ოფიციალურად შევა.
21-წლამდე ნაკრებების ევროპის 24-ე ჩემპიონატი 2023 წლის ზაფხულში, საქართველოსა და რუმინეთში გაიმართება. ევრო 2023-ის ფინალური მატჩი ბათუმში შედგება, ხოლო გახსნით მატჩს რუმინეთი უმასპინძლებს.
თავდაპირველად, ჩემპიონატის ერთ-ერთ მასპინძელ ქალაქად ფოთი განიხილებოდა, თუმცა UEFA-ს საორგანიზაციო ჯგუფის ექსპერტების რეკომენდაციით, რომელიც მათ საქართველოში ვიზიტის ფარგლებში, არსებული ინფრასტრუქტურის გაცნობის შედეგად შეიმუშავეს, ჯგუფური ეტაპის მატჩები ფოთის ნაცვლად, ქუთაისში გაიმართება.
21-წლამდე ნაკრებთა ევროპის ჩემპიონატის გამართვის უფლება საქართველომ 2020 წლის 3 დეკემბერს, UEFA-ს აღმასრულებელი კომიტეტის გადაწყვეტილებით მოიპოვა.
