ფუტსალი U19 | მარცხი რუმინეთთან, საქართველომ 2-ბურთიანი უპირატესობა ვერ შეინარჩუნა
ევროპის ჩემპიონატის მეინ რაუნდის მატჩში საქართველოს 19-წლამდელთა ფუტსალის ნაკრები რუმინეთს დაუპირისპირდა და უმძიმეს ბრძოლაში 2:3 დამარცხდა.
შეხვედრა აქტიურად ქართველებმა დაიწყეს და მეოთხე წუთზე ანგარიში ნოდარ ქურცაძემ გახსნა. შოთა ჭანუყვაძის შეგირდები არ გაჩერდნენ და ზუსტად 1 წუთში გიორგი გიორგაძემ სხვაობა ორამდე გაზარდა. პირველ ტაიმში „ჩვენებურები“ იდეალურად თამაშობდნენ, თუმცა მეორე ტაიმში ყველაფერი შეიცვალა.
რუმინელებმა ზეწოლა გააძლიერეს და საქართველოს 3 უპასუხო გოლი გაუტანეს. მეორე ნახევარი რუმინელთა უპირატესობით წარიმართა და ჭანუყვაძის ნაკრებმა მატჩში გარდატეხის შეტანა ვეღარ შეძლო. ბოლო წუთებში, რა თქმა უნდა, საქართველო აქტიურობდა, თუმცა ანგარიშის გათანაბრება ვერ შეძლო.