დღეს ერთა ლიგის ახალი გათამაშების კენჭისყრაა - შესაძლო მეტოქეები და სხვა დეტალები

დღეს, თბილისის დროით 21:00 საათიდან ამსტერდამში ერთა ლიგის რიგით მეორე, 2020-21 წლების გათამაშების კენჭისყრა გაიმართება. 

საქართველოს ნაკრები C ლიგაში იასპარეზებს და გუშინვე უეფა-მ კალათებში გუნდები გადაანაწილა, რაც მცირედით შესაძლო მეტოქეების პროგნოზირების საშუალებას გვაძლევს. 

როგორც ხედავთ, ვლადიმირ ვაისის გუნდი კალათში საბერძნეთთან, ალბანეთთან და მონტენეგროსთან ერთად მოხვდა, დანარჩენ კალათებში დარჩენილი 12 გუნდიდან კი - მაკედონია, კოსოვო, ბელარუსი, კვიპროსი, ესტონეთი, სლოვენია, ლიეტუვა, ლუქსემბურგი, სომხეთი, აზერბაიჯანი, ყაზახეთი, მოლდოვა, 3 ჩვენი მეტოქე გახდება.

C ლიგის თითოეული ჯგუფის გამარჯვებული B ლიგაში დაწინაურდება, ბოლოადგილოსნები კი ერთმანეთში, გასვლა-სახლის პრინციპით, 2022 წლის მარტში, ლიგაში დასარჩენ ფლეი-ოფში ითამაშებენ. ამის მიზეზი ისაა, რომ D ლიგაში მხოლოდ 2 ჯგუფი იქმნება.

აღსანიშნავია ისიც, რომ თუკი დასარჩენ ფლეი-ოფში მონაწილე რომელიმე გუნდი მსოფლიოს 2022 წლის ჩემპიონატის საკვალიფიკაციო ეტაპის ფლეი-ოფის მონაწილეც იქნება, მაშინ D ლიგაში გავარდნილი გუნდები ავტომატურად, უეფა-ს რეიტინგის მიხედვით, გამოვლინდება.

ერთა ლიგის 2020-21 წლების გათამაშება 3 სექტემბერს დაიწყება და ჯგუფური ეტაპი 17 ნოემბრამდე გაგრძელდება. A ლიგის ფინალები 2021 წლის 2; 3 და 6 ივნისსაა ჩანიშნული, ხოლო ლიგაში დასარჩენი ფლეი-ოფები 2022 წლის 24; 25; 28 და 29 მარტს ჩატარდება.