“გუნდის მიმართ სრული ნდობა მაქვს“ - მოურინიო ატლეტიკოსთან მატჩის წინ

მადრიდის რეალის მთავარმა მწვრთნელმა ჟოზე მოურინიომ თანაქალაქელ ატლეტიკოსთან მატჩის წინ პრესკონფერენცია გამართა.

გუნდის პერიოდული გათიშვები:

„არ ვიცი, შევძლებ თუ არა ამას. ეს ჩემი და ფეხბურთელების მიზანია. არ ვიცი, როგორც მწვრთნელი, შევძლებ თუ არა ამის მიღწევას, ან ფეხბურთელები, როგორც მოთამაშეები, შეძლებენ თუ არა, მაგრამ ეს არის ჩვენი მიზანი. ვცდილობთ, გამოვნახოთ დრო და დღე, რათა იმ საკითხებზე ვიმუშაოთ, რომლებიც გასაუმჯობესებელი გვაქვს. ეს პროცესია. არიან მწვრთნელები, რომლებიც გუნდებს ერთი, ორი, სამი, ოთხი, ხუთი ან ათი წლის განმავლობაში უწყვეტად ავარჯიშებენ და მუდმივად პროცესზე, განვითარებაზე, მუშაობისა და გაუმჯობესებისთვის საჭირო დროზე საუბრობენ. ახლა წარმოიდგინეთ ჩვენი მდგომარეობა — ერთად მხოლოდ რამდენიმე თვეა ვართ და შვიდი-რვა ოფიციალური მატჩი ჩავატარეთ. გაუმჯობესება გვჭირდება, მაგრამ ამავდროულად შედეგების მიღებაც გვიწევს და სწორედ ამისთვის ვმუშაობთ. მაგალითად, გუშინ ვიმუშავეთ, დღესაც ვიმუშავეთ მას შემდეგ, რაც თქვენ უკვე წასულები იყავით, რადგან, ცხადია, გვაქვს საკითხები, რომლებიც უნდა გავაუმჯობესოთ. საკუთარ თავში ძალიან დარწმუნებულები ვართ, მაგრამ ამავდროულად გვაქვს თავმდაბლობაც და გვესმის, რომ გასაუმჯობესებლად მუშაობა გვჭირდება.“

პენალტები:

„ახლა უკვე გვიანია და ეს სიმართლეა, რადგან იმ მატჩის შემდეგ კიდევ ერთი შეხვედრა ჩავატარეთ და ბევრი კითხვა დაგროვდა, რომელიც შეგიძლიათ დამისვათ. მაგალითად, შეგიძლიათ დამისვათ ძალიან მკაფიო და აშკარა კითხვა: რას ვფიქრობ იმაზე, რომ „ელჩემ“ მატჩი 11 ფეხბურთელით დაასრულა? მაგრამ თუ ამ გზით წავალთ, საბოლოოდ ხვალინდელ მატჩზე მოგვიწევს საუბარი.

ცოტა უცნაურია, რომ ერთი კვირის წინ უკვე ვიცოდით, ვინ იქნებოდა ხვალინდელი მატჩის არბიტრი, თუმცა მირჩევნია ვთქვა, რომ თუ ის დაინიშნა, ეს იმიტომ მოხდა, რომ ასეთი ემოციური მნიშვნელობის მატჩისთვის საჭირო ხარისხი და გამოცდილება აქვს. მატჩამდე მსაჯებზე საუბარი არ მიყვარს და მას ჩემი სრული ნდობა აქვს. მატჩის შემდეგ ვნახავთ, რა მოხდება, მაგრამ მანამდე ჩემი სრული ნდობა აქვს.“

ვინისიუსზე:

„ყველასთვის ერთნაირად მნიშვნელოვანია. არ ვიცი, შესაძლოა იმ ფეხბურთელებს, რომლებიც „რეალ მადრიდში“ უფრო დიდი ხანია თამაშობენ და იმ ისტორიულად ძალიან ნეგატიურ ატმოსფეროს აწყდებიან, რომელზეც თქვენ ადრე ისაუბრეთ, ცოტა მეტი წნეხი ჰქონდეთ, მაგრამ ასე არ ვფიქრობ. ჩვენ ყველანი ერთად ვართ და გვესმის, რამდენად რთული მატჩია. შეხვედრა ვინისიუს ჟუნიორისთვისაც ისეთივე მნიშვნელოვანია, როგორც ნებისმიერი ჩვენგანისთვის.“

გუნდის ძალა

„სამ მატჩში, როდესაც ბოლო წუთებზე მოსაგებად ან ფრედ დასასრულებლად გოლის გატანა გვჭირდებოდა, შეხვედრები წარმოუდგენელი ფიზიკური და ფსიქოლოგიური ძალით, თავდადებითა და შეუპოვრობით დავასრულეთ.

ცხადია, ნორმალური არ არის, „ელჩესთან“ 2:0-ს იგებდე და შემდეგ 80-ე წუთზე ანგარიში გათანაბრდეს. მაგრამ ისიც არ არის ჩვეულებრივი, რომ გათანაბრების შემდეგ სამ-ოთხ წუთში გუნდს ჯერ ერთი საგოლე მომენტი ჰქონდეს, შემდეგ მეორე და საბოლოოდ გოლი გაიტანოს და მოიგოს.

ასევე არ არის ჩვეულებრივი, რომ „ბეტისთან“ მატჩში თითქმის ბოლო წუთებზე გოლით აგებდე და გუნდს ჰქონდეს ის ფიზიკური და მენტალური ძალა, გული და შეუპოვრობა, რომ ესპირიტუმ წარმოუდგენელი გოლი გაიტანოს, შემდეგ მბაპემ პენალტი ვერ გამოიყენოს და დარჩენილ წუთებში ყველაფრისთვის ბრძოლა მაინც გააგრძელოს.

ამ გუნდს, ხარისხის გარდა, ერთი ძალიან მნიშვნელოვანი ძალა აქვს — ეს ჯგუფის ძალაა. სწორედ ამიტომ მაქვს გუნდის მიმართ ნდობა. ჩემპიონატი მარათონია — ის ყოველთვის ავტოსტრადა არ არის და არც ყოველთვის სწორი, დაბრკოლებების გარეშე გზა.“

„ატლეტიკო“

„ნუ მთხოვთ გუნდების შედარებას, ნუ მთხოვთ ობლაკის კურტუასთან ან რომეროს რიუდიგერთან შედარებას. ეს არ არის ჩემი სათქმელი. მე ვსაუბრობ ძლიერ გუნდზე, რომელსაც ბევრი ვარიანტი აქვს, ჰყავს შესანიშნავი მწვრთნელი, რომელმაც იცის, რა სურს, ირჩევს მისთვის სასურველ ფეხბურთელებს და ისეთ მოთამაშეებს, რომლებსაც მისი საფეხბურთო დნმ აქვთ. ამ გუნდზე მრავალი წლის განმავლობაში მუშაობდნენ და როცა მათ ვუყურებ, ვფიქრობ, რომ ჩემპიონობისთვის ბრძოლაში ისინი აუცილებლად იქნებიან.“

ელ კლასიკო თუ დერბი?

„ყოველი დღე მაძლევს მოტივაციას. მესმის, რომ ამას პატივისცემით მეკითხებით, მაგრამ როცა ამბობთ — „კარიერის ამ ეტაპზე“, პირველივე დღიდან დღემდე ეს ჩემთვის ყოველთვის ერთნაირი იქნება. წლები ვერ შემცვლის. „ვილიარეალთან“ მომდევნო მატჩი ისევე მაძლევს მოტივაციას, როგორც „ელ კლასიკო“ ან დერბი. მოტივაციის თვალსაზრისით ჩემთვის არანაირი განსხვავება არ არსებობს.

როგორც უკვე ვთქვი, „ელ კლასიკოები“, დერბები... ეს კულტურის ნაწილია. ისტორიის ნაწილია. ამიტომ მათ რაღაც დამატებითი აქვთ. მაგრამ როცა მოტივაციაზე ვსაუბრობთ, ეს ყოველდღიურობას ეხება.“

სიმეონეზე:

„კარიერის განმავლობაში იმდენ სისულელეს ამბობ, რომ თუ უკან-უკან გაიხედები, ჩვენ შორის არავინაა ისეთი, ვისაც კონკრეტულ მომენტში, ემოციების გავლენით, რაღაც არ უთქვამს. ზოგჯერ ამას სტრატეგიულადაც ვაკეთებთ, მაგრამ საბოლოოდ ან პატივს სცემ ადამიანს, ან არა — ასეა?

რამდენიმე წლის წინ, როდესაც დამიკავშირდნენ და მკითხეს, შევძლებდი თუ არა დიეგოზე მის დოკუმენტურ ფილმში საუბარს, ამაზე ორჯერ არ მიფიქრია. მან ზუსტად იცის, რას ვგრძნობ და რას ვფიქრობ მასზე. ახლა კი ისევ მეტოქეები ვართ, მაგრამ ამავე დროს თანამებრძოლებიც.“

გარდამტეხი დერბი?

„პესიმისტი არ ვარ და არ მინდა მოვლენებს კარგი ან ცუდი კუთხით შევხედო. თქვენ, როგორც ჟურნალისტი, კითხვას როგორც დადებითი, ისე უარყოფითი კონტექსტით სვამთ. როგორც მწვრთნელი, მე უარყოფითი კონტექსტით არ ვპასუხობ — მხოლოდ პოზიტიური კუთხით ვუყურებ და იმედი მაქვს, ყველაფერი კარგად იქნება.“

შეგახსენებთ, რომ მადრიდის ატლეტიკოსა და მადრიდის რეალის მომავალი დაპირისპირება 20 სექტემბრით თარიღდება და თბილისის დროით 18:15-დან დაიწყება.