ძირითადში დაბრუნდა და საგოლე პასი გააკეთა - მაისურაძის კარგი მატჩი

უკრაინის პრემიერლიგის მეხუთე ტურში გიორგი მაისურაძის „პოლისიამ“ „კუდრივკას“ უმასპინძლა და 5:1 გაიმარჯვა.

კონფერენს ლიგაზე „კოპენჰაგენთან“ მატჩის შემდეგ (29 ივლისი) „პოლისიას“ მთავარმა მწვრთნელმა ქართველი განაპირა მცველი სათადარიგოთა სკამზე გადასვა და უკრაინის პრემიერლიგის ზედიზედ 3 შეხვედრაში თავის გამოჩენის საშუალება არ მისცა.

გასულ ტურში „შახტართან“ მაისურაძე მეორე ტაიმში ცვლილებაზე შევიდა, ახლა კი ძირითად შემადგენლობაში გამოჩნდა და პირველივე წუთზე საგოლე პასი მიითვალა - ქართველი მცველის პასის შემდეგ გოლი ვლადისლავ ველეტენმა გაიტანა.

 

მე-12 წუთზე „კუდრივკა“ 10 ფეხბურთელით დარჩა, 42-ე წუთზე კი სტუმრებმა ბურთი საკუთარ კარში ჩაჭრეს და „პოლისიას“ უპირატესობა ორბურთიანი გახდა, თუმცა ტაიმის მიწურულს რეინალდინიო ვერლეიმ ერთი ბურთი გაქვითა. 67-ე წუთზე „კუდრივკას“ კიდევ ერთი ფეხბურთელი გაუძევეს. 71-ე და 76-ე წუთზე იგორ კრასნოპირმა დუბლი გაიფორმა, 87-ე წუთზე კი ცვლილებაზე შესულმა ლეანდრო ანდრადემ საბოლოო ანგარიში დააფიქსირა.

5 ტურის შემდეგ მაისურაძის გუნდი 12 ქულით სატურნირო ცხრილის პირველ ადგილზეა. მეორე ადგილზე 10 ქულით „კარპატია“, რომელსაც ერთი მატჩით ნაკლები აქვს ჩატარებული.