ტრანსფერს 10 მილიონი აჭიანურებს - სიტიმ როდრის ღირებულება გაზარდა

„ბარსელონა“ და „მანჩესტერ სიტი“ როდრის ტრანსფერზე მოლაპარაკებებს აგრძელებენ. MARCA-ს ინფორმაციით, პარასკევს კატალონიური კლუბის მიერ გაკეთებული ბოლო შეთავაზების შემდეგ მხარეები შეთანხმებას მნიშვნელოვნად მიუახლოვდნენ და საბოლოო შეთანხმება უახლოეს დღეებშია მოსალოდნელი.

„ბარსელონას“ ბოლო ოფიციალური შეთავაზება, რომელსაც მანამდე რამდენიმე ზეპირი წინადადებაც უძღოდა, 70 მილიონ ევროს შეადგენს. აქედან 60 მილიონი ევრო ფიქსირებული თანხაა, კიდევ 10 მილიონი კი სხვადასხვა ბონუსის სახით.

„მანჩესტერ სიტიმ“ ეს წინადადება არ მიიღო და კატალონიურ კლუბს 80 მილიონი ევროს, ფიქსირებული და ბონუსების ჩათვლით, გადახდა მოსთხოვა.

ამგვარად, ამ ეტაპზე კლუბებს შორის საბოლოო შეთანხმებას მხოლოდ 10 მილიონი ევრო აშორებს. სწორედ ამიტომ ორივე მხარე ოპტიმისტურადაა განწყობილი და მიაჩნია, რომ დარჩენილი სხვაობის აღმოფხვრა მცირე დათმობებით იქნება შესაძლებელი.

მოლაპარაკებები უახლოეს დღეებში გაგრძელდება, თუმცა კვირა რთული დღე იქნება — ორივე გუნდს მატჩი აქვს. „სიტისთვის“ ეს ოფიციალური შეხვედრაა, „ბარსელონასთვის“ კი ამხანაგური მატჩი. თუ შეთანხმება კვირას ვერ შედგება, ორივე კლუბი დარწმუნებულია, რომ გარიგებას ორშაბათს დაასრულებს.

„ბარსელონასა“ და „მანჩესტერ სიტის“ შორის მოლაპარაკებები მას შემდეგ დაიწყო, რაც როდრიმ კატალონიურ კლუბში გადასვლის სურვილი გამოთქვა და „რეალის“ შეთავაზება უარყო.

ახლა კი, როგორც ჩანს, როდრის „ბარსელონაში“ გადასასვლელად მხოლოდ ბოლო ნაბიჯი დარჩა - და ეს ნაბიჯი დამატებითი 10 მილიონი ევროს გადახდაა.