ფლიკი ახალ თავდამსხმელს ითხოვს - ბარსელონა ალვარესის ალტერნატივას ეძებს

„ბარსელონას“ მთავარი მწვრთნელი ჰანსი ფლიკი გუნდის დაკომპლექტების რაც შეიძლება სწრაფად დასრულებას ითხოვს. კატალონიელებისთვის ერთ-ერთ მთავარ პრიორიტეტად კვლავ ცენტრალური თავდამსხმელის დამატება რჩება, განსაკუთრებით რობერტ ლევანდოვსკის წასვლის შემდეგ.

ფლიკის მთავარი სამიზნე ხულიან ალვარესია, თუმცა მადრიდის „ატლეტიკო“ არგენტინელის გაყიდვაზე უარს ამბობს. ამის გამო „ბარსელონა“ პარალელურად სხვა ვარიანტებზეც მუშაობს, რათა ალვარესის ტრანსფერის ჩაშლის შემთხვევაში ალტერნატივა მზად ჰქონდეს.

რამდენიმე კვირის წინ კლუბის პრეზიდენტმა ჟოან ლაპორტამ დაადასტურა, რომ „ატლეტიკოს“ ოფიციალური შეთავაზება გაუგზავნეს.

„ძალიან სერიოზული შეთავაზება გავაკეთეთ. თუ მის მიღებას დათანხმდებიან, შესანიშნავია, მაგრამ ეს შეთავაზება უვადოდ არ იქნება ძალაში. გადაწყვეტილება უნდა მივიღოთ,“ — განაცხადა ლაპორტამ.

მისივე თქმით, შეთავაზებას ვადა ივლისის ბოლოსა და აგვისტოს დასაწყისში ეწურება. თუმცა მადრიდული კლუბი მოლაპარაკებების დაწყებას ამ დრომდე არ აპირებს და 10 აგვისტოს ალვარესის გუნდთან დაბრუნებას ელოდება, მიუხედავად იმისა, რომ ფეხბურთელს „ბარსელონაში“ გადასვლის სურვილი არაერთხელ გამოუხატავს.

სწორედ ამიტომ „ბარსელონას“ სპორტული დირექტორი დეკუ სატრანსფერო ბაზარზე აქტიურად მუშაობს. კატალონიელები მხოლოდ ალვარესზე ვერ იქნებიან დამოკიდებული, განსაკუთრებით იმ ფონზე, როცა „ატლეტიკოს“ პოზიცია უცვლელი რჩება.

ალვარესის შემდეგ „ბარსელონას“ მთავარი ალტერნატივა „ბორნმუთის“ 20 წლის თავდამსხმელი ჟუნიორ კრუპია. ფრანგ ფეხბურთელს შეუძლია როგორც ცენტრალურ თავდამსხმელად, ისე ფლანგსა და შემტევ ნახევარმცველად თამაში.

წყაროს ცნობით, თავად კრუპის ფლიკის პროექტში გადასვლა სურს, თუმცა „ბორნმუთი“, „ატლეტიკოს“ მსგავსად, ფეხბურთელის გაყიდვას არ აპირებს. ინგლისურმა კლუბმა მისი ფასი დაახლოებით 130 მილიონ ევროდ შეაფასა, თანხა, რომლის გადახდასაც „ბარსელონა“ არ აპირებს.

კატალონიურმა კლუბმა „ჩელსის“ თავდამსხმელ ჟოაო პედროს ტრანსფერის შესაძლებლობაც შეისწავლა, თუმცა მისი დამატება პრაქტიკულად შეუძლებლად მიიჩნევა, რადგან ბრაზილიელს ლონდონურ კლუბთან კონტრაქტი 2033 წლის ივნისამდე აკავშირებს.

წყაროს ცნობით, „ბარსელონა“ არც ერთ შემთხვევაში არ გადაიხდის გადაჭარბებულ თანხას რომელიმე ფეხბურთელში. კლუბში მიაჩნიათ, რომ ლევანდოვსკის წასვლის შემდეგ შეტევაში არსებული რესურსიც საკმარისია — ფერან ტორესი, დანი ოლმო, რაფინია, ლამინ იამალი და გორდონი საჭიროების შემთხვევაში ამ პოზიციის დაფარვას შეძლებენ.

ამასთან, დეკუს სიაში კიდევ რამდენიმე კანდიდატია და ზოგიერთ მათგანთან მოლაპარაკებებიც უკვე დაწყებულია. თუმცა კონკრეტული გადაწყვეტილება ჯერ მიღებული არ არის. ახალი ტრანსფერების განხორციელების ალბათობა განსაკუთრებით გაიზრდება იმ შემთხვევაში, თუ ზაფხულში ფერან ტორესი კლუბს დატოვებს.

მიუხედავად ამისა, „ბარსელონას“ მთავარი მიზანი კვლავ ხულიან ალვარესია. კლუბში იმედოვნებენ, რომ თავად ფეხბურთელის ზეწოლა საბოლოოდ „ატლეტიკოს“ პოზიციას შეცვლის. გავრცელებული ინფორმაციით, ალვარესმა ჯერ კიდევ მაისში აცნობა მადრიდული კლუბის ხელმძღვანელობას, რომ კარიერის „ბარსელონაში“ გაგრძელება სურს და უახლოეს დღეებში ამ სურვილს კიდევ ერთხელ დააფიქსირებს.