„ეს გუნდი იმედს არასდროს გაგიცრუებთ, წინ კიდევ ერთი თამაში გვაქვს“ | მესის კომენტარი
არგენტინის ნაკრები მსოფლიო ჩემპიონატის ფინალში გავიდა. „ალბისელესტემ“ ინგლისი 2:1 დაამარცხა და ლიონელ მესიმ საკუთარი გუნდის გამოსვლაზე ისაუბრა.
„მინდა, არგენტინელ გულშემატკივრებს ვუთხრა იგივე, რაც კატარში ვთქვი: „ისიამოვნეთ! ეს გუნდი იმედს არასდროს გაგიცრუებთ!“
ეს მსოფლიო ჩემპიონატი სრული სიგიჟე იყო და მუნდიალის კიდევ ერთ ფინალში გასვლა საოცარი შეგრძნებაა. მიუხედავად იმისა, რომ საფეხბურთო მატჩი იყო, ჩვენი ჰიმნის ჩართვისთანავე რაღაც განსაკუთრებული ვიგრძენით. ეს უბრალოდ მორიგი გამარჯვება არ ყოფილა. ეს იყო გამარჯვება, რომელიც არგენტინელ ხალხს ძალიან უნდოდა.
სიგიჟეა, რასაც მივაღწიეთ. ზედიზედ ხუთი ფინალი, მსოფლიოს ზედიზედ ორი ფინალი... ბოლო ოთხი წელია, საუკეთესო ნაკრები ვართ. ეს ვისაც არ უნდა წყინდეს და რასაც არ უნდა ამბობდნენ, ფაქტია, რომ მოედანზე ვამტკიცებთ, რომ არავინ არაფერს გვჩუქნის. სიამაყითა და მთელი გულით ვთამაშობთ. ქამბექი შევასრულეთ და ძალიან ამაყი ვარ.
სიმართლე გითხრათ, ამ მსოფლიო ჩემპიონატისთვის თითქმის ერთი წელიწადი ვემზადებოდი. დეკემბერი არგენტინაში გავატარე და ყოველ დილით და შუადღეს ვვარჯიშობდი. ვიცოდი, რომ მაქსიმუმი უნდა გამეკეთებინა, რათა ტურნირს საუკეთესო ფორმაში შევხვედროდი.
ამ გუნდში ეჭვი არც ერთი წამით შემპარვია. ვიცი, ამ შემადგენლობას რა შეუძლია. დიახ, მსოფლიო ჩემპიონატს ეჭვებითა და ტრავმებით შევხვდით, თუმცა როდესაც ეს გუნდი ერთიანია, რაღაც განსაკუთრებულს აკეთებს. კიდევ ერთი ნაბიჯი გვაქვს გადასადგამი. კიდევ ერთი მატჩი და ყველაფერს გავაკეთებთ, ბოლომდე ვიბრძოლებთ“.
შეგახსენებთ, რომ ფინალურ შეხვედრაში არგენტინა ესპანეთს დაუპირისპირდება. ინგლისი მესამე ადგილისთვის იბრძოლებს და საფრანგეთს შეხვდება.
