13-დან 13 | ხვიჩა კვარაცხელიამ პარი სენ-ჟერმენის რეკორდი დაამყარა

საფრანგეთის ლიგა 1-ის 28-ე ტურში „პარი სენ-ჟერმენმა“ „ტულუზა“ 3:1 დაამარცხა. ხვიჩა კვარაცხელია საკუთარ გუნდში ერთ-ერთი საუკეთესო იყო და საგოლე გადაცემა მიითვალა. „კვარამ“ ისტორიული შედეგი დააფიქსირა და 13-დან 13 ორთაბრძოლა მოიგო.

X-ის გვერდის, Paris Stats Germain-ის ინფორმაციით, ქართველმა გარემარბმა პარიზული გრანდის რეკორდი დაამყარა. ხვიჩა „პარი სენ-ჟერმენის“ პირველი ფეხბურთელია, რომელმაც ამდენი ორთაბრძოლა ისე მოიგო, რომ არც ერთი წაუგია. ეს სტატისტიკა 2015/16 წლებიდან არის ხელმისაწვდომი და პსჟ-ის მაისურით 13 ორთაბრძოლა წაგებულის გარეშე არავის მოუგია.

????Incroyable performance de Kvaratskhelia avec 13 duels gagnés sur 13 disputés (dont 2 aériens) ! Il s'agit du record de duels gagnés par un joueur du PSG sans en perdre un seul depuis que la stat est disponible (2015-2016) https://t.co/xRucMVngWv

— Paris Stats Germain (@ParisStats) April 3, 2026

„ტულუზას“ წინააღმდეგ ხვიჩამ მოედანზე 67 წუთი გაატარა და ბურთს 70-ჯერ შეეხო. ხვიჩამ 46-დან 40 ზუსტი გადაცემა შეასრულა და 3 საკვანძო პასი მიითვალა. ქართველმა გარემარბმა მეტოქის კარისკენ 6-ჯერ დაარტყა და მის წინააღმდეგ წესები სამჯერ დაარღვიეს. Sofascore-მა მისი თამაში 8.0 ქულით შეაფასა, Whoscored-მა — 8.4-ით.

ცნობისთვის, „პარი სენ-ჟერმენს“ 63 ქულა დაუგროვდა და ლიგა 1-ის სატურნირო ცხრილის ლიდერია. პარიზელებს მომდევნო შეხვედრა ჩემპიონთა ლიგაზე ელით. „კვარა“ და კომპანია გიორგი მამარდაშვილის „ლივერპულს“ დაუპირისპირდებიან.