“მისი ადგილი გუნდში თითქმის გაუჩინარდა“ - AS-ის სტატია გაგნიძეზე

ავტორიტეტული ესპანური გამოცემა AS ლუკა გაგნიძეზე ვრცელ სტატიას აქვეყნებს სათაურით: „დარტყმა გაგნიძისთვის“.

AS:

„ზოგი ფეხბურთელი ჩუმად ქრება. ლუკა გაგნიძე სწორედ ასეთია. ქართველი ნახევარმცველი ჯერ კიდევ გრანადას ეკუთვნის, მაგრამ მისი ადგილი გუნდში თითქმის გაუჩინარდა — თითქოს დრო ისე გავიდა, რომ მას სივრცეც აღარ დარჩა საკუთარი თავის დასამკვიდრებლად. ნახევარდაცვაში იზან გონსალესის მოსვლა მხოლოდ ამყარებს იმ განცდას, რომელიც უკვე თვეებია ყალიბდება: გუნდის კარი გაგნიძისთვის სულ უფრო იხურება.

ქართველი ნახევარმცველი გრანადაში გრძელვადიან პროექტად ჩამოვიდა — ახალგაზრდა, ფიზიკურად ძლიერი მოთამაშე პოტენციალით, რომელსაც სათამაშო დროისა და სწორი გარემოს პირობებში საკუთარი თამაში უნდა განევითარებინა, თუმცა მიმდინარე სეზონი გამორჩენილი შანსების ჯაჭვად იქცა. მისი მონაწილეობა მინიმალური იყო და ძალიან შორს იმ სცენარისგან, რომელშიც მისი ასაკის ფეხბურთელს განვითარებისთვის სჭირდება. გრანადამ ნახევარდაცვაში სხვა გამოსავალი იპოვა და ასეთ სიტუაციებში დრო ხშირად უფრო დაუნდობელია, ვიდრე ერთჯერადი გადაწყვეტილება.

კლუბის ნაბიჯი იზან გონსალესის დამატებით ამ იდეას კიდევ უფრო ამყარებს. ნახევარდაცვა კიდევ უფრო გადაიტვირთა, ხოლო გაგნიძის როლი მინიმუმამდე შემცირდა. ქართველი ფეხბურთელი პაჩეტასთვის უკვე მეექვსე არჩევანია ნახევარდაცვაში. გუნდი უპირატესობას ანიჭებს იმ პროფილებს, რომლებიც უკეთ ერგება მწვრთნელის ამჟამინდელ ხედვასა და რთული სეზონის მოთხოვნებს — სეზონის, სადაც შეცდომებს მაღალი ფასი აქვს და მოთმინება შეზღუდულია.

სტატისტიკურადაც, გაგნიძის სეზონი ამ გაუცხოებას ასახავს: ცოტა დრო, მინიმალური გავლენა და თითქმის ფორმალური ყოფნა. ბოლო ცხრა მატჩში მან მხოლოდ ორში მიიღო მონაწილეობა, ჯამში 15 წუთი. ეროვნულ ჩემპიონატში ერთხელაც არ დაუწყია ძირითად შემადგენლობაში — სულ 129 წუთი აქვს ნათამაშები, რაც გაცილებით ნაკლებია, ვიდრე კოპა დელ რეიზე, სადაც სამივე მატჩი დაიწყო, ითამაშა 246 წუთი და ყველა შეხვედრაში სრული 90 წუთი გაატარა მოედანზე. ეს საკმარისი არ აღმოჩნდა პაჩეტას დასარწმუნებლად. რთულია რაიმეს აშენება მაშინ, როცა სათამაშო დრო არ გაქვს, და მის გარეშე ნებისმიერი ანალიზი არასრული რჩება.

კლუბი ყოველთვის მშვიდად ეკიდებოდა მის სიტუაციას. პაჩეტა არაერთხელ უსვამდა ხაზს, რომ ახალგაზრდა ფეხბურთელებს დრო სჭირდებათ განვითარებისთვის და ყველა ერთნაირი ტემპით არ პროგრესირებს. საჯარო გამოსვლებში მან არაერთხელ აღნიშნა, რომ ენდობა ფეხბურთელის ყოველდღიურ შრომას, თუმცა ასევე გულწრფელად თქვა, რომ საბოლოოდ გადამწყვეტი ფაქტორი შედეგია. თავად გაგნიძეს ხმამაღლა არასდროს უსაუბრია. წინა განცხადებებში ის საუბრობდა სწავლაზე, ადაპტაციაზე და ჩუმად მუშაობის გაგრძელებაზე — გააზრებული აქვს, რომ ფეხბურთი ყოველთვის სწრაფად არ აჯილდოებს იმას, რასაც მას აძლევ.“

შეგახსენებთ, რომ ლუკა გაგნიძე ესპანურ კლუბში 1-წლიანი იჯარის წესით იმყოფება. დღემდე გრანადას მაისური ყველა ტურნირზე ერთად 13 მატჩში მიიღო მონაწილეობა და 3 საგოლე პასი გააკეთა.

1 საგოლე პასი ლა ლიგა 2-ში მიითვალა, ორი ესპანეთის სამეფო თასზე. ჯამში მან მხოლოდ 375 წუთი ითამაშა.